დიმიტრი პესკოვი - აშშ-თან კონტაქტებს დადებითად ვაფასებთ

აშშ-თან კონტაქტებს დადებითად ვაფასებთ, - ამის შესახებ კრემლის პრესსპიკერმა, დიმიტრი პესკოვმა ბრიფინგზე განაცხადა.

დიმიტრი პესკოვი აშშ-ის პრეზიდენტის, დონალდ ტრამპის სპეციალური წარმომადგენლის, სტივ უიტკოფის განცხადებას გამოეხმაურა, რომლის თანახმადაც უკრაინაში ცეცხლის შეწყვეტის შესახებ რუსეთთან მოლაპარაკებებში პროგრესია.

„ჯერჯერობით რაიმე სახის შეთანხმების მკაფიო მონახაზი არ არსებობს, მაგრამ ამ შეთანხმებისთვის პოლიტიკური ნება არსებობს. კიდევ ერთხელ ვიმეორებ, რომ ჩვენ ძალიან დადებითად ვაფასებთ კონსტრუქციულ და შინაარსობრივ კონტაქტებს, რომლებიც შედგა“, - განაცხადა პესკოვმა.

მისი თქმით, რუსეთი და აშშ მშვიდობის მიღწევისთვის ბევრს მუშაობენ.

„საკმაოდ ინტენსიური მუშაობა მიმდინარეობს. ინფორმაციის გაცვლა პირადად ხდება. ვგულისხმობ სანქტ-პეტერბურგში ვლადიმერ პუტინსა და სტივ უიტკოფს შორის ახლახან გამართულ შეხვედრას. რა თქმა უნდა, სამშვიდობო ინიციატივების ძიება რთული საკითხია, ამიტომ სწრაფი შედეგების მოლოდინი არ უნდა გვქონდეს“, - აღნიშნა კრემლის პრესსპიკერმა.