დიდი ბრიტანეთის საგარეო საქმეთა მინისტრთან ნაყოფიერი საუბარი მქონდა, - ამის შესახებ აშშ-ის სახელმწიფო მდივანი, მარკო რუბიო სოციალურ პლატფორმა X-ზე წერს.

“დიდი ბრიტანეთის საგარეო საქმეთა მინისტრს, დევიდ ლემის მადლობა გადავუხადე აშშ-ის დელეგაციის მასპინძლობისთვის, რომელსაც პრეზიდენტის სპეციალური წარმომადგენელი, კიტ კელოგი ხელმძღვანელობს. ჩვენი გუნდი უკრაინელ და ბრიტანელ კოლეგებთან მნიშვნელოვან და კარგ ტექნიკურ შეხვედრებს ელის”, - წერს მარკო რუბიო.

მისი თქმით, დიდ ბრიტანეთში ვიზიტს უახლოეს თვეებში ხელახლა დაგეგმავს.

ცნობისთვის, დღეს უკრაინის, დიდი ბრიტანეთის, ამერიკის შეერთებული შტატების, გერმანიისა და საფრანგეთის წარმომადგენლები ლონდონში შეხვედრას გამართავენ. ისინი უკრაინაში ომის დასრულებისა და ცეცხლის შეწყვეტის საკითხზე იმსჯელებენ.

აშშ-ის სახელმწიფო დეპარტამენტმა დაადასტურა, რომ მოლაპარაკებებში მონაწილეობას სახელმწიფო მდივანი, მარკო რუბიო არ მიიღებს.

ასევე, Sky News-ის ინფორმაციით, ხუთი ქვეყნის ოფიციალური პირების მოლაპარაკებებში გაერთიანებული სამეფოს, გერმანიის, საფრანგეთისა და უკრაინის საგარეო საქმეთა მინისტრებიც არ მიიღებენ მონაწილეობას, თუმცა უკრაინის საგარეო საქმეთა მინისტრს, ანდრეი სიბიგას დიდი ბრიტანეთის საგარეო საქმეთა მინისტრი, დევიდ ლემი პირადად შეხვდება.