აშშ-ის პრეზიდენტის, დონალდ ტრამპის განცხადებით, ის უკრაინას რუსეთისგან გადარჩენაში ეხმარება და რომ არა მისი დახმარება, ქვეყანა ძალიან მალე განადგურდებოდა.

„ეს დიდი საომარი მანქანაა, ვაღიაროთ და რომ არა მე, მე მივეცი მათ „ჯაველინები“, რომლებმაც ტანკები გაანადგურეს. იცით, ის ტანკების მომენტი დიდი მომენტი იყო, როდესაც ტანკები ტალახში გაიჭედნენ და მე მათ „ჯაველინების“ უზარმაზარი რაოდენობა მივეცი. ესენი არიან ტანკსაწინააღმდეგო რაკეტები. მათ ყველა ის ტანკი გაანადგურეს, როდესაც ისინი ტალახში გაიჭედნენ. ეს მნიშვნელოვანი მომენტი იყო, რადგან ეს ტანკები რომ შესულიყვნენ, კიევიდან 71 მილის დაშორებით იქნებოდნენ და კიევს აიღებდნენ. ეს ომის დასასრული იქნებოდა, ის ერთ დღეში დასრულდებოდა“, - განაცხადა ტრამპმა The Atlantic-თან ინტერვიუში.

მისი თქმით, სამწუხაროა, რომ ომი გაგრძელდა, რადგან შედეგად ბევრი ადამიანი დაიღუპა, „გაცილებით მეტი, ვიდრე იტყობინებიან“.

„მე ნამდვილად შემიძლია ვთქვა, რომ მე ამ ქვეყნის ხსნას ვახორციელებ. ვფიქრობ, რომ უკრაინას დიდ სამსახურს ვუწევ“, - განაცხადა ტრამპმა.