გიორგი აბდალაძე 2011 წლის 26 მაისის დარბევაზე - ხალხს გასვლის საშუალება არ მისცეს, ყველას თავი ჰქონდა დახეთქილი, ისე სცემეს, ადამიანები რუსთაველზე წვიმაში დაყარეს, შველას რომ ითხოვდნენ, უარესად სცემდნენ
საშინლად სცემეს ადამიანები - ქალი, კაცი, დიდი, პატარა, ბავშვი, მოხუცი, ასაკოვანი, მნიშვნელობა არ ჰქონდა, ყველას თავები ჰქონდათ დახეთქილი, - ამის შესახებ ფოტოგრაფმა გიორგი აბდალაძემ პარლამენტის დროებითი საგამოძიებო კომისიის სხდომაზე, განაცხადა.
კომისიის დღევანდელ სხდომაზე „ფოტოგრაფების საქმე“ განიხილება, რა დროსაც გიორგი აბდალაძემ 2011 წლის 26 მაისის აქციის დარბევის ეპიზოდი გაიხსენა.
„საშინლად სცემეს ადამიანები. კინოთეატრ „რუსთველშიც“ შევარდნენ. იქიდან ნაცემი უამრავი ადამიანი გამოიყვანეს. ისე გააკეთეს, რომ ხალხს გასვლის საშუალება არ მისცეს და ძირითადი ნაკადი წაიყვანეს პარლამენტის მიმართულებით, შიდა სივრცე სადაც არის, ვერსად გაქცეულიყვნენ. თითქმის ყველას თავი ჰქონდა დახეთქილი, ქალი, კაცი, დიდი, პატარა, ბავშვი, მოხუცი, ასაკოვანი, მნიშვნელობა არ ჰქონდა, ყველას თავები ჰქონდათ დახეთქილი, ისე სცემეს. ადამიანებს ხელბორკილები რომ დაადეს, მერე რუსთაველზე წვიმაში დაყარეს. შველას რომ ითხოვდნენ, ესენი უარესად სცემდნენ იმ ადამიანებს. მერე დაამწკრივეს ეს ადამიანები და რუსთაველზე მსვლელობით ჩაატარეს, წაიყვანეს საპატიმროებში“. - განაცხადა გიორგი აბდალაძემ.
v-if="article.gallery" v-html="article.gallery"
