შალვა პაპუაშვილი - დანამდვილებით ვიცით, რომ „ლელო“ და „საქართველოსთვის“ არჩევნებისთვის არა თუ ემზადებიან, აქტიურ მოქმედებებზე არიან გადასული - სასაცილოა, რომ ეს ადამიანები ამომრჩევლებს თვალში ნაცარს აყრიან
დანამდვილებით ვიცით, რომ ამ მომენტისათვის „ლელო“ და „საქართველოსთვის“ არჩევნებისთვის არა თუ ემზადებიან, აქტიურ მოქმედებებზე არიან გადასული - სასაცილოა, რომ ეს ადამიანები ამომრჩევლებს თვალში ნაცარს აყრიან, თავი რევოლუციონერებად მოაქვთ და ამ დროს არჩევნებისთვის ორგანიზება და მომზადება აქვთ დაწყებული, - ამის შესახებ ჟურნალისტებს პარლამენტის თავმჯდომარემ შალვა პაპუაშვილმა განუცხადა.
პაპუაშვილმა აქვე აღნიშნა, რომ საქართველო პატარა ქვეყანაა და ეს ყველაფერი ადგილობრივი თვითმმართველობის არჩევნების წინ რეგიონში კარგად ჩანს და არ იმალება.
მისივე თქმით, უცხოელის წინაშე ცალ ფეხზე მდგომ ოპოზიციას არჩევნებზე რაიმე წარმატების იმედი არ უნდა ჰქონდეს.
“როგორ შეიძლება უცხოელის წინაშე ცალ ფეხზე მდგომ ოპოზიციას არჩევნებზე რაიმე წარმატების იმედი ჰქონდეს?! ამომრჩეველს ერთადერთ რამეს ჰპირდებიან, რომ გარედან მიღებული რეკომენდაციებით, რჩევებით თუ მითითებებით იმოქმედებენ. ოპოზიცია და NGO სექტორი საქართველოს ხელისუფლებას ერთადერთ რამეს საყვედურობს: - ევროკომისიის პრესმდივნის თანაშემწე რომ გეუბნება, რატომ არ უჯერებო. მათ ხელისუფლების პასუხისმგებლობა ამ დონეზე ესმით. ჩვენ მხოლოდ ქართველ ხალხს ვუჯერებთ“, - განაცხადა შალვა პაპუაშვილმა.
