უკრაინაში უნგრეთის დაზვერვის ქსელი გამოააშკარავეს, ორი აგენტი დაკავებულია. ამის შესახებ ინფორმაციას უკრაინის უსაფრთხოების სამსახური ავრცელებს.

„უსაფრთხოების სამსახურმა უკრაინის ისტორიაში პირველად გამოააშკარავა უნგრეთის სამხედრო დაზვერვის აგენტურული ქსელი, რომელიც ჩვენი სახელმწიფოს საზიანოდ ჯაშუშურ საქმიანობას აწარმოებდა.

ამ სადაზვერვო უჯრედის ამოცანა იყო ზაკარპატიეს ოლქის სამხედრო დაცულობის შესახებ ინფორმაციის მოპოვება, რეგიონის სახმელეთო და საჰაერო თავდაცვაში დაუცველი ადგილების მოძიება და ასევე ადგილობრივი მაცხოვრებლების საზოგადოებრივ-პოლიტიკური შეხედულებების შესწავლა: კერძოდ, შესწავლა მათი ქცევითი სცენარების, თუ რეგიონის ტერიტორიაზე უნგრული ჯარები შევლენ,“ - ნათქვამია განცხადებაში.

აღინიშნება, რომ ზაკარპატიეს ოლქში კომპლექსური ღონისძიებების შედეგად უკრაინის უსაფრთხოების სამსახურმა უნგრეთის სპეცსამსახურების ქსელის ორი აგენტი დააკავა.

გამოძიების მიერ დადგენილია, რომ ორივე დაკავებულის კურატორი უნგრეთის სამხედრო დაზვერვის თანამშრომელია, რომლის იდენტობა უკრაინის სპეცსამსახურებმა უკვე დაადგინეს.

ერთ-ერთი დაკავებული აგენტი 40 წლის ყოფილი სამხედროა, რომლის რეკრუტირება და „მოლოდინის რეჟიმში“ გადაყვანა უნგრელებმა 2021 წელს მოახდინეს. მეორე დაკავებული უკრაინის თავდაცვის ძალების ყოფილი სამხედროა, რომელმაც ქვედანაყოფი 2025 წელს დატოვა. არსებული ინფორმაციით, მისი ამოცანა იყო უნგრული სპეცსამსახურების ინფორმირება ზაკარპატიეს ოლქში თვითმფრინავებისა და ვერტმფრენების არსებობის შესახებ, ასევე სამხედრო ნაწილში თავდაცვითი სისტემების შესახებ, სადაც ის სამსახურს გადიოდა.

დაკავებულებს სამხედრო მდგომარეობის პირობებში სახელმწიფო ღალატში ედებათ ბრალი. მათ ქონების კონფისკაციით სამუდამო პატიმრობა ემუქრებათ.