რუსულმა ძალებმა 9 ივლისის ღამეს უკრაინას 741 რაკეტით და დრონით შეუტიეს, უკრაინელებმა 718 მათგანი გაანეიტრალეს, - ინფორმაციას უკრაინული მედია ქვეყნის შეიარაღებული ძალების საჰაერო ძალებზე დაყრდნობით ავრცელებს.

უკრაინული მედია წერს, რომ ეს უკრაინის წინააღმდეგ ერთ ღამეში გამოყენებული დრონებისა და რაკეტების ყველაზე დიდი რაოდენობაა რუსეთის შეჭრის შემდეგ.

საჰაერო ძალებმა დარტყმები 4 ადგილას დააფიქსირა, ასევე ნამსხვრევები 14 ლოკაციაზე ჩამოცვივდა.

9 ივლისის ღამეს რუსებმა უკრაინას Shahed-ისა და სხვა ტიპის 728 დრონით, Х-101 „ისკანდერ -კ“ ტიპის 7 ფრთოსანი რაკეტით და Х-47М2 „კინჟალის“ 6 აერობალისტიკური რაკეტით შეუტიეს.

უკრაინის საჰაერო ძალებში აცხადებენ, რომ მტრის კუთვნილი 296 დრონი ჩამოაგდეს, 415 კი ლოკალურად დაიკარგა. ამასთან, უკრაინელებმა „ისკანდერ -კ“ ტიპის 7 ფრთოსანი რაკეტაც ჩამოაგდეს.

უკრაინული მედიის ცნობით, 9 ივლისის ღამეს ლუცკზე რუსეთის ჯარების მიერ დრონებისა და რაკეტების გამოყენებით სრულმასშტაბიანი შეჭრის დაწყებიდან ყველაზე მასშტაბური თავდასხმა განხორციელდა, რასაც ხანძარი და ნგრევა მოჰყვა. მსხვერპლის შესახებ ინფორმაცია, ჯერჯერობით, არ ვრცელდება.