ევროპარლამენტი იმეორებს მოწოდებას მზია ამაღლობელის დაუყოვნებლივ და უპირობო გათავისუფლებასთან დაკავშირებით და მის წინააღმდეგ წაყენებული ყველა ბრალდების მოხსნას, რომლებიც პოლიტიკურად მოტივირებულია, - ამის შესახებ აღნიშნულია საქართველოს შესახებ რეზოლუციის ტექსტში შეტანილ ცვლილებაში, რომელიც ევროპარლამენტმა დღეს დაამტკიცა.

ევროპარლამენტი გამოხატავს შეშფოთებას მზია ამაღლობელის მხედველობის მდგომარეობის კრიტიკულად გაუარესების გამო და სანდო სამედიცინო მომსახურებაზე სასწრაფო წვდომას ითხოვს.

„ევროპარლამენტი მკაცრად გმობს საქართველოს აქტიური სამოქალაქო საზოგადოებისთვის გარემოს მუდმივ და განზრახ განადგურებას, რუსული სტილის რამდენიმე შემზღუდავი კანონმდებლობის მიღებით, მკაცრად გმობს ახალ საკანონმდებლო ინიციატივას, რომელიც მოითხოვს ყველა სამოქალაქო საზოგადოების ორგანიზაციის გრანტის რეგისტრაციას მთავრობაში და ავალდებულებს უცხოელ დონორებს, მიიღონ აღმასრულებელი ხელისუფლების თანხმობა ადგილობრივი ორგანიზაციებისთვის გრანტების გაცემისთვის; წუხს ხელისუფლების ბოლოდროინდელი გადაწყვეტილების გამო, გაყინოს პოლიტიკური პატიმრებისა და მათი ოჯახების მხარდამჭერი საზოგადოებრივ დაფინანსების [კრაუდფანდინგის] ინიციატივები და კამპანიების საბანკო ანგარიშები; მოუწოდებს ხელისუფლებას, დაუყოვნებლივ შეწყვიტოს დაშინება, მუქარა, პოლიტიკურად მოტივირებული დევნა და ფიზიკური ძალადობა საქართველოში სამოქალაქო საზოგადოების წარმომადგენლების, პოლიტიკური ლიდერების, სამოქალაქო აქტივისტების, ჟურნალისტებისა და მედიის მუშაკების მიმართ; გმობს რამდენიმე ევროპელი ჟურნალისტის საქართველოში შესვლაზე თვითნებურ და გაუმართლებელ უარის თქმას“, - აღნიშნულია დოკუმენტში.

შეგახსენებთ, ევროპარლამენტმა 490 ხმით 147-ის წინააღმდეგ საქართველოს შესახებ რეზოლუცია შესწორებებით მიიღო.