პარლამენტთან მიმდინარე საპროტესტო აქციების დროს ჯგუფური ძალადობის ორგანიზებისა და მასში მონაწილეობის ბრალდებით დაკავებული პირების სასამართლო პროცესი, სადაც ბრალდებული გიორგი გორგაძე შეუძლოდ გახდა, განახლდა.

სხდომა ამ დრომდე შეჩერებული იყო, რადგან სასწრაფო სამედიცინო დახმარება იყო გამოძახებული. როგორც ადვოკატები აცხადებენ, ბრალდებული გასინჯეს, ექიმების რეკომენდაციით, ის კლინიკაში გადაყვანას არ საჭიროებდა, რის შემდეგაც პროცესი გაგრძელდა.

სხდომათა დარბაზში ბრალდებულის შეყვანის შემდეგ, მას მოსამართლე თამარ მჭედლიშვილმა უთხრა, რომ თუკი, თავს შეუძლოდ იგრძნობდა, მაშინვე ეთქვა.

ამ წუთებში, პროკურატურის მოწმეს კითხავენ.

გორგაძე პროცესის დაწყებისას გახდა შეუძლოდ, მასთან თავდაპირველად სასამართლოს ექიმი გამოიძახეს, სხდომათა დარბაზი კი დამსწრეებს დაატოვებინეს. ცოტა ხანში კი, სასწრაფო სამედიცინო დახმარების ჯგუფის მიყვანა გახდა საჭირო. როგორც ადვოკატებისგან გაირკვა, ბრალდებულს პრეპარატი "ნიმესილი" მშიერს ჰქონდა მიღებული, ამასთან, მას ცოტა ხნის წინ ფილტვების ანთება ჰქონდა გადატანილი, რასაც მსგავსი მდგომარეობა ახასიათებს.

ცნობისთვის, დაკავებულებიდან სამს - ზვიად ცეცხლაძეს, ვეფხია კასრაძესა და ვასილ კაძელაშვილს ჯგუფური ძალადობის ორგანიზებასა და ხელმძღვანელობას ედავებიან. მათ 6-დან 9-წლამდე თავისუფლების აღკვეთა ემუქრებათ.

ბრალდებულებიდან ხუთს - გიორგი გორგაძეს, ირაკლი მიმინოშვილს, ინსაფ ალიევს, თორნიკე გოშაძეს და ნიკოლოზ ჯავახიშვილს ჯგუფურ ძალადობაში მონაწილეობას ედავებიან. მათ 4-დან 6-წლამდე თავისუფლების აღკვეთა ემუქრებათ.