თბილისის მერი მუნიციპალურ ინსპექციას ავალებს, დასრულებული საცხოვრებელი კორპუსების ექსპლუატაციაში მისაღებად შესაბამისი ღონისძიებები გაატაროს.

თბილისის მთავრობის სხდომაზე კალაძემ თბილისის მუნიციპალური ინსპექციის ხელმძღვანელს მიმართა, რომ მესაკუთრეების კანონიერი ინტერესების დაცვის მიზნით გაამკაცროს მონიტორინგი და გაატაროს კანონმდებლობით გათვალისწინებული ყველა ზომა იმ შემთხვევებზე, როდესაც მშენებლობა დასრულებულია და დამკვეთი კომპანიის მხრიდან არ ხდება ვალდებულებების სრულად და ჯეროვნად შესრულება შენობების ექსპლუატაციაში მისაღებად.

კალაძის თქმით, ეს ძალიან დიდ პრობლემას წარმოადგენს იმ ოჯახებისთვის, ვინც აშენებული კორპუსში საცხოვრებელი ბინა კეთილსინდისიერად შეიძინა და მშენებლის თუ დეველოპერის დაუდევრობის გამო ექსპლუატაციაში მიღებას ვერ ახერხებს.

კალაძემ ხაზგასმით აღნიშნა, რომ ამ მიმართულებით მნიშვნელოვანია პრევენციული ღონისძიებების და მონიტორინგის გამკაცრება.

“სამშენებლო საქმიანობის ხარისხის კონტროლი და ზედამხედველობა ჩვენთვის უმნიშვნელოვანესი პრიორიტეტია, მათ შორის არის ქალაქში დასრულებული ობიექტების ექსპლუატაციაში მიღება და სანებართვო პირობებთან შესაბამისობის დადასტურება.

ამ კუთხით წლების განმავლობაში კონკრეტული გამოწვევებია არსებობდა, რაც სხვადასხვა არქიტექტურული დარღვევის გამო მრავალბინიანი საცხოვრებელი სახლების ექსპლუატაციაში მიღების პრობლემას უკავშირდებოდა. აღნიშნული პრობლემის გამო ათასობით ოჯახს, კეთილსინდისიერ მესაკუთრეებს ექმნებოდათ სირთულეები, ცხოვრობდნენ უმძიმეს პირობებში, რადგან მათი საცხოვრებელი კორპუსი ექსპლუატაციაში მიღებული არ იყო. ვინაიდან მათ საკუთრებას დასრულებულის სტატუსი არ ჰქონდა, მრავალბინიან საცხოვრებელ კორპუსებში ბინათმესაკუთრეთა ამხანაგობები ვერ იქმნებოდა და მესაკუთრეები მუნიციპალური პროგრამების სიკეთეებით ვერ სარგებლობდნენ.

აღნიშნული პრობლემის მოგვარების მიზნით, მუნიციპალიტეტმა მსგავსი სამშენებლო ობიექტების ექსპლუატაციაში მიღების დროებითი წესი შეიმუშავა. პარლამენტის მხარდაჭერით საკანონმდებლო ცვლილება განხორციელდა და მსგავსი ობიექტების ექსპლუატაციაში მიღებასთან დაკავშირებით 2023 წლის 27 ივლისამდე განაცხადების მიღება ხდებოდა“, - განაცხადა კალაძემ.

მერის ინფორმაციით, აღნიშნული წესის ფარგლებში, სახელმწიფოს მიერ აკრედიტებული საექსპერტო ბიუროების დასკვნებისა და უსაფრთხოების ნორმების დაცვით, ექსპლუატაციაში უკვე მიღებულია 910 დასრულებული შენობა, 30 000-მდე ოჯახმა (მესაკუთრემ) მიიღო უფლებრივად უნაკლო ქონება და შესაძლებლობა ისარგებლონ ბინათმესაკუთრეთა ამხანაგობის პროგრამებით და სხვა მუნიციპალური სერვისებით.

“ასევე, დროებითი წესის ფარგლებში, ამჟამად, განხილვის პროცესშია 230 მრავალბინიანი საცხოვრებელი კორპუსის ექსპლუატაციაში მიღების საკითხი, რომელიც 10 000-მდე ოჯახს (მესაკუთრეს) ეხება. ვინაიდან, აღნიშნულ კორპუსების მცხოვრებლების მხრიდან შემოვიდა არაერთი თხოვნა, მინდა, დავავალო მუნიციპალურ ინსპექციას, მოსახლეობის თხოვნის გათვალისწინებით, პროცესის დაჩქარებისა და აღნიშნული საცხოვრებელი კორპუსების დროულად ექსპლუატაციაში მიღების მიზნით, გაატაროს შესაბამისი ღონისძიებები, მათ შორის, ადგილზე ობიექტის შეფასების, კანონმდებლობით წარმოსადგენი დოკუმენტაციის მომზადების ხელშეწყობისა და დამატებითი კონსულტაციების კუთხით.

მუნიციპალიტეტმა გაამკაცრა კანონმდებლობა შენობების ექსპლუატაციაში მიღებასთან დაკავშირებით, რათა გაზრდილიყო ერთი მხრივ, მშენებლობის ხარისხი და მეორე მხრივ, დაინტერესება და მოტივაცია ნებართვის მფლობელი სამშენებლო კომპანიების/დაინტერესებული პირების, დროულად მოახდინონ მშენებლობადასრულებული ობიექტების ექსპლუატაციაში მიღებაზე მომართვა და სანებართვო პირობების შესრულების დადასტურება.

ამ მიმართულებით გვაქვს ხელშესახები შედეგები, გაზრდილია როგორც მომართვიანობა, ასევე ექსპლუატაციაში მიღების მაჩვენებელი. 2018 წლიდან დღემდე მუნიციპალურმა ინსპექციამ მოქმედი კანონმდებლობის, სამშენებლო ნორმების, სტანდარტებისა და სანებართვო პირობების დაცვით აშენებული 7 000-მდე შენობა მიიღო ექსპლუატაციაში“, -აღნიშნა თბილისის მერმა მთავრობის სხდომაზე.