თბილისის საქალაქო სასამართლოში, ჯგუფურ ძალადობაში მონაწილეობის ბრალდებით დაკავებული მსახიობის, ანდრო ჭიჭინაძის, ონისე ცხადაძისა და კიდევ 9 პირის სასამართლო პროცესი მიმდინარეობს.

სხდომას ესწრებიან ბრალდებულები, გარდა რევაზ კიკნაძისა.

ასევე, ბრალდების მხარემ დააყენა შუამდგომლობა და დაცვის მხარის მტკიცებულებათა ნაწილის უდავოდ გახდომა მოითხოვა.

ბრალდების მხარემ დაცვის მხარის მტკიცებულებებთან დაკავშირებით განაცხადა, რომ პროკურატურა მათ მტკიცებულებებს უდავოდ ხდის, თუმცა დაცვის მხარე აღნიშნულ შუამდგომლობას არ დაეთანხმა.

ცნობისთვის, პარლამენტთან მიმდინარე საპროტესტო აქციების დროს, ჯგუფურ ძალადობაში მონაწილეობის ბრალდებით 11 პირი დააკავეს.

დაკავებულებს - ანდრო ჭიჭინაძეს, ონისე ცხადაძეს, ჯანო არჩაიას, რუსლან სივაკოვს, ლუკა ჯაბუას, გურამ მირცხულავას, ვალერი თეთრაშვილს, გიორგი ტერიშვილს, ირაკლი ქერაშვილს, რევაზ კიკნაძესა და სერგეი კუხარჩუკს ბრალი საქართველოს სისხლის სამართლის კოდექსის 225-ე მუხლის მეორე ნაწილით წარედგინათ, რაც ჯგუფურ ძალადობაში მონაწილეობას გულისხმობს.

აღნიშნული დანაშაული სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.