ბრაზილიისა და ჩინეთის პრეზიდენტებმა BRICS-ისა და ორმხრივი ურთიერთობების საკითხები განიხილეს, - ამის შესახებ ინფორმაციას სააგენტო Reuters-ი ბრაზილიის პრეზიდენტის ადმინისტრაციაზე დაყრდნობით ავრცელებს.

„ლუის ინასიუ ლულა და სილვამ და სი ძინპინმა ორშაბათს ერთი საათის განმავლობაში მულტილატერალიზმის დაცვაში BRICS-ისა და „დიდი ოცეულის“ როლზე ისაუბრეს. ლიდერებმა ხაზი გაუსვეს ორივე ქვეყნის ეკონომიკებს შორის ახალი ბიზნეს შესაძლებლობების მოძებნის აუცილებლობას“, - ნათქვამია ბრაზილიის პრეზიდენტის ადმინისტრაციის განცხადებაში.

ჩინეთის სახელმწიფო მედიის ცნობით, ბრაზილიის პრეზიდენტთან სატელეფონო საუბარში ჩინეთის პრეზიდენტმა, სი ძინპინმა განაცხადა, რომ ახლა „ორ ქვეყანას შორის ურთიერთობები ისტორიაში საუკეთესო ეტაპზეა“.

„ორივე ქვეყანამ ერთად უნდა იმუშაოს გლობალურ გამოწვევებთან გასამკლავებლად და უკრაინის კრიზისის პოლიტიკური გზით მოსაგვარებლად“, - განაცხადა ჩინეთის პრეზიდენტმა.