4 ოქტომბერს იწყება და მთავრდება ყველაფერი, 4 ოქტომბერს მივაღწევთ ჩვენ იმას, რისი გაკეთებაც გვინდა, - ამის შესახებ მოძრაობა “რუსთაველის გამზირის” ლიდერმა პაატა ბურჭულაძემ “პალიტრანიუსის” გადაცემა “360 გრადუსში” ადგილობრივი არჩევნების დღეს ჩანიშნულ აქციასთან დაკავშირებით საუბრისას განაცხადა.

ბურჭულაძის თქმით, “ქართულ ოცნებას” აღარ მისცემენ იმის საშუალებას, რომ უამრავი ხალხი გამოვიდეს და მერე ისევ სახლში დაბრუნდეს.

“4 ოქტომბერს ყველა გამოვა, ვისაც ექნება სურვილი და ეს იქნება მინიმუმ 200-300 ათასი ადამიანი. ამ ყრილობაზე დასასწრები მოსაწვევები ხელიდან ხელში გადაიცემა, და, ასევე, ყველას კარებში დახვდება - “4 ოქტომბერს, 16:00 საათზე გიწვევთ რუსთაველზე, ივანიშვილის რეჟიმის მშვიდობიანად დამხობისთვის”.

აქამდე ყოველთვის იყო, რომ შეიკრიბებოდნენ, “დაგვინიშნეთ ახალი არჩევნების” ძახილით, გამოვიდოდა 200 ათასი ადამიანი და წავიდოდა სახლში. 4 ოქტომბერს ასე არ იქნება. ჩვენ თუ მივეცით ხმა მესამე რესპუბლიკას და მე დარწმუნებული ვარ, რომ ყველა მისცემს, ესენი წავლენ უკვე სახლში, ჩვენ აღარ მივდივართ! 4 ოქტომბერს იწყება და მთავრდება ყველაფერი. როგორ უნდა მივცეთ ამას საშუალება, რომ ხალხი კიდევ წავიდეს სახლში? 4-ში ვიწყებთ და 4-შივე ვამთავრებთ, 4 ოქტომბერს მივაღწევთ ჩვენ იმას, რისი გაკეთებაც გვინდა”, - განაცხადა ბურჭულაძემ.

რაც შეეხება უსაფრთხოების ზომებს დაგეგმილ აქციასთან დაკავშირებით, მან განაცხადა, რომ პროტესტი იქნება ძალიან მშვიდობიანი და ის მის შვილიშვილებთან ერთად აპირებს რუსთაველის გამზირზე გასვლას.

ბურჭულაძის თქმით, მის შტაბში არაერთმა პოლიციელმა დარეკა და უთხრა, რომ აქციის დღეს ხალხის მხარეს დადგება.

“მე იქ საჩხუბრად არ მივდივარ, მივდივარ შვილიშვილებთან ერთად. უსაფრთხოება იქნება დაცული, ამის გარანტიას გაძლევთ. ხელი არ წაუცდეს ვინმე პოლიციელს და რამე არაკანონიერი არ გააკეთოს იმიტომ, რომ იქვე დაისჯება.

ერთი რამ შემიძლია გაგიმხილოთ, რომ ძალიან ბევრი პოლიციელი რეკავს და ამბობს, რომ 4-ში გადმოვლენ ჩვენს მხარეს. ისინი (“ქართული ოცნება”) დგანან ამ 5 ათას პოლიციელზე, რომელთაგანაც ბევრი ჩვენს მხარეს გადმოვა. სხვა დასაყრდენი არავინ ჰყავს.

4-ში ვიწყებთ, 4-შივე დამთავრდება ყველაფერი, დამიჯერეთ. 5-ში “ქართული ოცნება” უკვე აღარ უნდა იყოს მთავრობაში”, - განაცხადა პაატა ბურჭულაძემ.