ირანის ეროვნული უშიშროების უმაღლესი საბჭოს განცხადებით, მისმა ბირთვულმა კომიტეტმა დაამტკიცა ადრე ხელმოწერილი შეთანხმებები ატომური ენერგიის საერთაშორისო სააგენტოსთან თანამშრომლობის განახლების შესახებ, - ინფორმაციას გამოცემა Deutsche Welle ირანულ სააგენტო NourNews-ზე დაყრდნობით ავრცელებს.

ირანის ეროვნული უშიშროების საბჭოში წარდგენილ დოკუმენტს 9 სექტემბერს, კაიროში ხელი მოაწერეს ატომური ენერგიის საერთაშორისო სააგენტოს გენერალურმა დირექტორმა რაფაელ გროსიმ და ირანის საგარეო საქმეთა მინისტრმა აბას არაღჩიმ ეგვიპტის საგარეო საქმეთა მინისტრ ბადრ აბდელ-ატას შუამავლობით.

ირანის ეროვნული უშიშროების საბჭოს სამდივნოს განცხადებაში აღნიშნულია, რომ შეთანხმებების შესრულება დამოკიდებული იქნება ირანის ბირთვული ობიექტების უსაფრთხოების უზრუნველყოფაზე.

„ირანისა და მისი ბირთვული ობიექტების წინააღმდეგ ნებისმიერი მტრული ქმედების შემთხვევაში, მათ შორის გაერო-ს უშიშროების საბჭოს ადრე შეწყვეტილი რეზოლუციების აღდგენის შემთხვევაში, ამ შეთანხმებების შესრულება შეჩერდება“, - ხაზგასმულია დოკუმენტში.

ცნობისთვის, თეირანსა და ატომური ენერგიის საერთაშორისო სააგენტოს შორის თანამშრომლობა ივნისში, 12-დღიანი ომის შემდეგ შეჩერდა, როდესაც ისრაელმა და შეერთებულმა შტატებმა ირანის ბირთვულ ობიექტებზე შეტევა განახორციელეს. ირანის ხელისუფლებამ სააგენტოს ინსპექტორები ბირთვულ ობიექტებზე თავდასხმების დროს მათი უმოქმედობის გამო გააკრიტიკა და ირანის პრეზიდენტის, მასუდ პეზეშკიანის ბრძანებით, ქვეყნიდან გააძევა.