ისრაელის მიერ ქალაქ ღაზაზე სახმელეთო შეტევის დაწყება მიუღებელია. შესაბამისი განცხადება გერმანიის საგარეო საქმეთა მინისტრმა, იოჰან ვადეფულმა გააკეთა.

„ქალაქ ღაზაზე შეტევის განახლება აბსოლუტურად არასწორ გზას წარმოადგენს. ჩვენ ამას უარვყოფთ და ეს ისრაელის მთავრობას ნათლად ავუხსენით“, - განაცხადა იოჰან ვადეფულმა.

ისრაელის მიერ სახმელეთო შეტევის დაწყება შვედეთის საგარეო საქმეთა მინისტრმა, მარია მალმერ სტენერგარდმაც გააკრიტიკა.

„ჩვენ შეშფოთებულები ვართ და ამ გეგმების წარდგენისთანავე განვაცხადეთ, რომ ძალის გამოყენებით ტერიტორიის ნებისმიერი სახით ცვლილება საერთაშორისო სამართლის დარღვევა იქნებოდა. ღაზაში არსებული ვითარებით შეშფოთებულები ვართ“, - აღნიშნა შვედეთის საგარეო საქმეთა მინისტრმა.

შეგახსენებთ, დღეს ღამით, ისრაელმა ქალაქ ღაზას ოკუპაციის მიზნით სახმელეთო შეტევა დაიწყო.

ისრაელის თავდაცვის ძალების ცნობით, ქალაქ ღაზადან 350 000-ზე მეტი პალესტინელის ევაკუაცია განხორციელდა.