მე მგონი, უნდა ილოცონ იმ ადამიანებმა, რომლებმაც ასეთი რამ გააკეთეს. ძალიან მკაცრი იქნება სახელმწიფო ნებისმიერი ადამიანის მიმართ, რომელიც ხელს აღმართავს პოლიციელზე, - ამის შესახებ პრემიერ-მინისტრმა, ირაკლი კობახიძემ ბრიფინგზე აქციის დროს დაშავებული ჟურნალისტებისა და პოლიციელების შესახებ დასმული კითხვის საპასუხოდ განაცხადა.

კობახიძემ აქციის მონაწილეები “ნაციონალური მოძრაობის” წევრებს შეადარა და თქვა, რომ ისინი მათი ხელწერით მოქმედებენ.

“ჩამოსვლის წინ ვუყურებდი კადრებს, როდესაც საზოგადოებრივი მაუწყებლის ჟურნალისტს დაესხნენ, ასევე “იმედის” ჟურნალისტი იყო. რა თქმა უნდა, ესეც აჩვენებს მათ რეალურ სახეს, როგორი დამოკიდებულება აქვთ მათ მედიის მიმართ. ეს არის ჩვეულებრივად “ნაცის” სახე. ხომ გახსოვთ, როგორი დამოკიდებულება ჰქონდა ამ პოლიტიკურ ძალას თავის დროზე, როდესაც ისინი იყვნენ ხელისუფლებაში და იგივე ხელწერით მოქმედებენ ეს ახალგაზრდა “ნაცებიც”. ახალგაზრდა კაცი იყო, რომელმაც დააზიანა ერთ-ერთი ჟურნალისტი. ახალგაზრდა “ნაციც” არის ზუსტად ისეთივე “ნაცი”, როგორებიც იყვნენ ხელისუფლებაში შედარებით უფროსი თაობის წარმომადგენლები. ყველა მიიღებს ძალიან მკაცრ პასუხს.

რაც შეეხება სამართალდამცველებს, არიან დაშავებულები, მათ შორის, ერთ-ერთ დაშავებულს აქვს საკმაოდ მძიმე მდგომარეობა, აქვს მოტეხილობა, აქვს ჰემატომა და ერთი რამ შემიძლია ვთქვა, რომ მე მგონი, უნდა ილოცონ იმ ადამიანებმა, რომლებმაც ასეთი რამ გააკეთეს. ძალიან მკაცრი იქნება სახელმწიფო ნებისმიერი ადამიანის მიმართ, რომელიც ხელს აღმართავს პოლიციელზე. უმკაცრესი იქნება სახელმწიფო ნებისმიერი ადამიანის მიმართ, რომელიც ხელს აღმართავს პოლიციელზე. ეს რეაგირება არ იქნება მათთვის მარტივი და მსუბუქი”, - განაცხადა კობახიძემ.