ნათლად ვხედავთ ჩვენი პარტნიორების განზრახვებსა და შესაძლებლობებს და ვიმუშავებთ მათთან, რათა უზრუნველვყოთ, რომ ევროპაში ჩვენი საერთო თავდაცვის პოტენციალი არ დაიკარგოს, - ამის შესახებ უკრაინის პრეზიდენტმა, ვოლოდიმირ ზელენსკიმ საგარეო დაზვერვის სამსახურის დირექტორთან, ოლეგ ივაშჩენკოსთან შეხვედრის შემდეგ განაცხადა.

მისი თქმით, ივაშჩენკოს დაავალა, უფრო აქტიურად ითანამშრომლოს უკრაინის იმ პარტნიორებთან, რომლებსაც შეუძლიათ უკრაინისთვის მეტი იარაღისა და საჭირო ინვესტიციების მიწოდება.

ზელენსკის განცხადებით, ივაშჩენკომ მიაწოდა ინფორმაცია იმის შესახებ, თუ როგორ იყენებენ რუსები თავიანთი ჩრდილოვანი ფლოტის ტანკერებს არა მხოლოდ ომის დასაფინანსებლად, არამედ დივერსიისა და დესტაბილიზაციის გამომწვევი სხვადასხვა ოპერაციისთვის ევროპაში.

„ტანკერებიდან დრონების გაშვების ბოლოდროინდელი შემთხვევები ერთ-ერთი ასეთი მაგალითია. ვუზიარებთ ჩვენს პარტნიორებს ინფორმაციას და მნიშვნელოვანია, რომ მათ გადადგან ხელშესახები ნაბიჯები რუსეთის საპასუხოდ. ჩვენ ამ მიმართულებით ყველა დონეზე ვმუშაობთ და ჩვენს პარტნიორებთან, როგორც საჯარო, ასევე კერძო სექტორთან, მეტი შეხვედრა და მოლაპარაკებები გაიმართება“, - აღნიშნა ზელენსკიმ.