ესპანეთი უკრაინისთვის აშშ-სგან იარაღის შესყიდვის თაობაზე ნატო-ს ინიციატივას შეუერთდება, - ამის შესახებ ესპანეთის პრემიერ-მინისტრმა, პედრო სანჩესმა განაცხადა.

„ნატო-ს ინიციატივა PURL რამდენიმე კვირის წინ ჩამოყალიბდა. ესპანეთი, რომელიც ჩრდილო-ატლანტიკური ალიანსის და უკრაინის თავდაცვისა და მხარდაჭერის ერთგულია, ამ ინიციატივას შეუერთდება“, - განაცხადა პედრო სანჩესმა.

ამასთან, სანჩესი ესპანეთის თავდაცვის ხარჯების შესახებ აშშ-ის პრეზიდენტის, დონალდ ტრამპის კრიტიკას გამოეხმაურა და აღნიშნა, რომ მისი ადმინისტრაცია ვალდებულებებს ასრულებს.

„პრეზიდენტმა ტრამპმა იცის, რომ ესპანეთის პრემიერ-მინისტრის თანამდებობაზე ჩემი დანიშვნის შემდეგ არა მხოლოდ ჩვენს ვალდებულებებს ვასრულებთ, არამედ წინა ადმინისტრაციების ვალდებულებებიც შევასრულეთ“, - აღნიშნა ესპანეთის პრემიერ-მინისტრმა.