ძალიან ცუდი და სახიფათო ცვლილებაა, ვაპირებ, რომ ამ საკითხზე ადვოკატებსაც მოვუწოდო, რომ თუ ამ დაშვებას გააკეთებს კანონი და გაავრცელებს ამ აკრძალვას ადვოკატების მიმართ, რომ ისინი დარჩნენ ტელეფონებისა და ტექნიკური საშუალებების გარეშე სასამართლო დარბაზში, დიახ, არ უნდა შევიდნენ ადვოკატები სასამართლო სხდომებზე, ვიდრე არ მოხდება ამ ინკვიზიციური და უფლებების შემლახავი კანონის უკან წაღება, - ამის შესახებ იურისტმა, „მართლმსაჯულების სახლის” დამფუძნებელმა ეკა ბესელიამ „პალიტრანიუსის“ გადაცემა „360 გრადუსში” განაცხადა.

ბესელიას თქმით, ადვოკატებს შეუძლიათ ძალიან ძლიერი ზეგავლენა მოახდინონ იმ სახიფათო გადაწყვეტილებაზე, რომლის მიხედვითაც სასამართლო სხდომებზე ტელეფონების შეტანა იზღუდება.

„მე მახსოვს ის პერიოდი, სასამართლოზე რომ შევდიოდი წინა რეჟიმის დროს და ტელეფონებს გარეთ ვტოვებდით. მძიმედ მახსოვს ეს პროცესი და ერთ-ერთი ინიციატორი ვიყავი 2013 წელს, როდესაც ჩვენ შევცვალეთ ეს აკრძალვა, გავაუქმეთ და მივიღეთ ცვლილებები, რომლითაც სასამართლო დარბაზი გავხსენით და ამავე დროს, ასეთი დისკრიმინაციული აკრძალვები გავაუქმეთ. ამიტომ ჩემთვის ეს ასმაგად უფრო მტკივნეული თემაა და ძალიან კატეგორიული ვიქნები და მინდა ყველა ადვოკატს ვუთხრა, რომ უნდა იაქტიურონ. 10 ათასზე მეტი წევრი ჰყავს ადვოკატთა ასოციაციას, რომელსაც ახლა ჰქონდა 20 წლის საიუბილეო თარიღი და ეს თარიღი არ არის ციფრები, ეს არის ისტორია და ასეთი მასშტაბური პროფესიული გაერთიანება სხვა არ არის ქვეყანაში. ეს ძალიან დიდი ძალაა, ამიტომ ადვოკატებს შეუძლიათ ძალიან ძლიერი ზეგავლენა მოახდინონ ამ მანკიერ და ძალიან სახიფათო გადაწყვეტილებაზე.

ვითარება საკმაოდ რთულია. მგონია, რომ დასრულდა ამ საშინელი კანონების მიღება და ყოველდღე ვხედავ, როგორ უარესდება კანონმდებლობა”, - განაცხადა ეკა ბესელიამ.