ადვოკატთა ასოციაციის თავმჯდომარე ირაკლი ყანდაშვილი იურიდიული დახმარების სამსახურის ხელმძღვანელს, დავით სიმონიას შეხვდა. ამის შესახებ ინფორმაციას ადვოკატთა ასოციაცია ავრცელებს.

როგორც გავრცელებულ ინფორმაციაშია ნათქვამი, შეხვედრა ადვოკატთა ასოციაციის ოფისში გაიმართა.

„შეხვედრის ფარგლებში მხარეებმა ადვოკატთა ასოციაციისა და იურიდიული დახმარების სამსახურის საქმიანობის სპეციფიკაზე, მიმდინარე პროექტებსა და სამომავლო თანამშრომლობის გაღრმავების შესაძლებლობებზე იმსჯელეს. განსაკუთრებული ყურადღება დაეთმო ინსტიტუციებს შორის მჭიდრო და ეფექტიანი თანამშრომლობის მნიშვნელობას.

ადვოკატთა ასოციაციასა და იურიდიული დახმარების სამსახურს არაერთი ერთობლივი პროექტი აქვს განხორციელებული. ორმხრივი თანამშრომლობა ადამიანის უფლებების დაცვის, იურიდიული პროფესიის გაძლიერებისა და დამოუკიდებელი, ხარისხიანი მართლმსაჯულების უზრუნველყოფის პროცესის ხელშეწყობას ითვალისწინებს“, - ნათქვამია ინფორმაციაში.