ირაკლი კობახიძე ნებისმიერ ცივილიზებულ ქვეყანაში გამოიკითხებოდა, რადგან გვახსოვს, მისი ნათქვამი, რომ მათ „დიდ სიურპრიზს“ დაახვედრებდა,- ამის შესახებ მოძრაობა „რუსთაველის გამზირის” ერთ-ერთი ლიდერის, მსოფლიო ბანის პაატა ბურჭულაძის შვილმა, ლექსო ბურჭულაძემ განაცხადა.

მისი თქმით, 4 ოქტომბერს თბილისში განვითარებულ მოვლენებზე მხოლოდ ხელისუფლება, საკუთარი ნარატივით საუბრობს და არ აწყობს, რომ ორგანიზატორებმა ისაუბრონ, „ამიტომ არ აქვთ კომუნიკაციის შესაძლებლობა“.

„4 ოქტომბრის შემდეგ არანაირი კომუნიკაცია არ გაგვაჩნია [პაატა ბურჭულაძესთან], ოჯახის არცერთ წევრს, მათ შორის, არც ბავშვებს. სრულიად გაუგებარია, რა პრობლემა შეიძლება არსებობდეს 5-6 წლის ბავშვთან სატელეფონო კომუნიკაციის, ვიზიტზე საუბარი არ არის. ახსნა-განმარტება არ არსებობს - რა საშიშროება შეიძლება არსებობდეს ოჯახის წევრებთან კომუნიკაციითა და ელემენტარული ინფორმაციის გაცვლით. ამას ვაკავშირებ იმასთან, რომ მათ არ აწყობთ ორგანიზატორებმა ისაუბრონ. 4 ოქტომბერზე მხოლოდ და მხოლოდ ხელისუფლება საუბრობს, მხოლოდ იმ ნარატივით, რომელიც მათ აწყობს.

რაც შეეხება ირაკლი კობახიძის გამოკითხვას, ნებისმიერ ცივილიზებულ ქვეყანაში ის გამოიკითხებოდა, რადგან გვახსოვს, რომ გამოვიდა და თქვა, რომ მათ „დიდ სიურპრიზს" დაახვედრებდა. ეს როგორ არ არის გამოსაკვლევი, როდესაც ეს რეალურად ვნახეთ",- განაცხადა ლექსო ბურჭულაძემ.