Reuters - აშშ ნატო-ს სამეთაურო ცენტრებში თანამშრომლების რაოდენობას ამცირებს
აშშ ნატო-ს სამეთაურო ცენტრებში თანამშრომლების რაოდენობას ამცირებს, - ინფორმაციას Reuters-ი წყაროებზე დაყრდნობით ავრცელებს.
გამოცემის წყაროების ცნობით, აშშ-ის პრეზიდენტის, დონალდ ტრამპის ადმინისტრაციამ ევროპელ პარტნიორებს აცნობა, რომ ადმინისტრაცია ალიანსის სამხედრო და სადაზვერვო ოპერაციების ზედამხედველობის სტრუქტურებში 200-მდე თანამდებობის გაუქმებას გეგმავს.
წყაროების განცხადებით, აშშ-ის ადმინისტრაციის გადაწყვეტილება დიდ ბრიტანეთში არსებულ ნატო-ს დაზვერვის ცენტრსა და ბრიუსელში მდებარე ნატო-ს სპეციალური ოპერაციების ძალების სარდლობას შეეხება.
ნატო-ს წარმომადგენელმა გამოცემასთან საუბარში აღნიშნა, რომ აშშ-ის მიერ თანამშრომლების რაოდენობის ცვლილება ჩვეულებრივ მოვლენას წარმოადგენს.
„ნატო და აშშ-ის ხელისუფლება მჭიდრო კონტაქტში არიან ჩვენი საერთო პოზიციის შესახებ, რათა ნატო-მ შეკავებისა და თავდაცვის ძლიერი შესაძლებლობები შეინარჩუნოს“, - აღნიშნა ნატო-ს წარმომადგენელმა.
