ისრაელის პრემიერ-მინისტრმა ბენიამინ ნეთანიაჰუმ მიიღო აშშ-ის პრეზიდენტის დონალდ ტრამპის მოწვევა, „მშვიდობის საბჭოს“ შეუერთდეს, - ინფორმაციას The Times of Israel-ი ნეთანიაჰუს ოფისზე დაყრდნობით ავრცელებს.

შეგახსენებთ, აშშ-ის პრეზიდენტმა დონალდ ტრამპმა „მშვიდობის საბჭოს“ შემადგენლობა გასულ კვირას დაასახელა. საბჭო წარმოადგენს ინიციატივას, რომელიც მიზნად ისახავს გლობალური კონფლიქტების, მათ შორის ისრაელი-ღაზას კონფლიქტის, მოგვარებას.

თეთრი სახლის განცხადებით, „მშვიდობის საბჭო“, რომელსაც აშშ-ის პრეზიდენტი უხელმძღვანელებს, ღაზას დროებით მმართველობას ზედამხედველობას გაუწევს და სექტორის რეკონსტრუქციის შემდგომ ეტაპს წარმართავს.