აშშ-ის სახელმწიფო მდივან მარკო რუბიოსა და ლიბანის პრეზიდენტ ჯოზეფ აუნს შორის სატელეფონო საუბარი შედგა, - ინფორმაციას მედია საშუალებები ლიბანის პრეზიდენტის ადმინისტრაციაზე დაყრდნობით ავრცელებენ.

ლიბანის პრეზიდენტის ადმინისტრაციის განცხადებაში ნათქვამია, რომ ჯოზეფ აუნმა მადლობა გადაუხადა მარკო რუბიოს „ცეცხლის შეწყვეტის შეთანხმების მისაღწევად ვაშინგტონის მიერ გაწეული ძალისხმევისთვის და ყველა დონეზე მხარდაჭერისთვის“.

„თავის მხრივ, რუბიომ დაადასტურა, რომ ლიბანში მშვიდობის, უსაფრთხოებისა და სტაბილურობის დამყარების წინაპირობად ცეცხლის შეწყვეტის შეთანხმების მისაღწევად მიმდინარე ძალისხმევას განაგრძობს“, - აცხადებენ ლიბანის პრეზიდენტის ადმინისტრაციაში.

განცხადებაში არაფერია ნათქვამი აუნსა და ისრაელის პრემიერ-მინისტრ ბენიამინ ნეთანიაჰუს შორის შესაძლო მოლაპარაკებებზე.

მანამდე, ლიბანის პრეზიდენტმა განაცხადა, რომ ისრაელთან ნებისმიერი პირდაპირი მოლაპარაკების დაწყებამდე მნიშვნელოვანია ცეცხლის შეწყვეტა.

„ლიბანის მიერ ისრაელისთვის მოთხოვნილი ცეცხლის შეწყვეტა ორ ქვეყანას შორის პირდაპირი მოლაპარაკებების ბუნებრივი საწყისი წერტილია“, - ნათქვამია აუნის განცხადებაში.

აშშ-ის პრეზიდენტმა დონალდ ტრამპმა სოციალურ ქსელში დაწერა, რომ ლიბანისა და ისრაელის ლიდერები მოლაპარაკებებს გამართავენ, რაც ათწლეულების შემდეგ პირველად მოხდება.

„ვცდილობ, ისრაელსა და ლიბანს შორის ცოტაოდენი „სასუნთქი სივრცე“ შეიქმნას. დიდი ხანია, რაც ორ ლიდერს ერთმანეთთან არ უსაუბრია. დაახლოებით 34 წელია. ეს ხვალ მოხდება. მშვენიერია!“- დაწერა ტრამპმა.