ლიბანის პრეზიდენტი - ცეცხლის შეწყვეტა მოლაპარაკებების გაგრძელების კარიბჭეა და წარმოადგენს ვარიანტს, რომელიც სარგებლობს როგორც შიდა, ასევე საერთაშორისო მხარდაჭერით
ლიბანის პრეზიდენტის ჯოზეფ აუნის განცხადებით, ისრაელთან ცეცხლის შეწყვეტის შეთანხმება მოლაპარაკებების გაგრძელების კარიბჭეა და ლიბანის ხელისუფლება პრიორიტეტს სამხრეთ ლიბანის ოკუპირებული ტერიტორიებიდან ისრაელის ჯარების გაყვანას ანიჭებს.
„პირდაპირი მოლაპარაკებები დელიკატური და გადამწყვეტი მნიშვნელობისაა; მომავალ ფაზაში უნდა არსებობდეს ეროვნული პასუხისმგებლობის ერთიანი განცდა, რადგან მსოფლიოს ყურადღება ლიბანზეა მოპყრობილი. სახელმწიფოს პოზიციაა ცეცხლის შეწყვეტის შეთანხმების განმტკიცება, ისრაელის ძალების ოკუპირებული სამხრეთ ტერიტორიებიდან გაყვანა, პატიმრების გათავისუფლება და სასაზღვრო დავების მოგვარება. ცეცხლის შეწყვეტა მოლაპარაკებების გაგრძელების კარიბჭეა და წარმოადგენს ვარიანტს, რომელიც სარგებლობს როგორც შიდა, ასევე საერთაშორისო მხარდაჭერით“, - აღნიშნა ლიბანის პრეზიდენტმა.
მისი თქმით, ლიბანის არმია მნიშვნელოვან როლს შეასრულებს ისრაელის ძალების გასვლის შემდეგ.
„ლიბანის არმია მნიშვნელოვან როლს შეასრულებს ისრაელის ძალების გასვლის შემდეგ, განლაგდება სამხრეთ საერთაშორისო საზღვრამდე, შეწყვეტს შეიარაღებულ მოქმედებებს და დაარწმუნებს სამხრეთის მოსახლეობას სოფლებსა და ქალაქებში დაბრუნდნენ და რომ არმიისა და ლეგიტიმური უსაფრთხოების ძალების გარდა სხვა შეიარაღებული ძალები არ იქნებიან“, - აღნიშნა ლიბანის პრეზიდენტმა.
