ირანის საგარეო საქმეთა სამინისტროს განცხადებით, თუ შეერთებული შტატები ჰორმუზის სრუტის ბლოკადას განაგრძობს, ირანი საპასუხო ზომებს მიიღებს.

„თუ მეორე მხარე გადაწყვეტს თავისი ვალდებულებების დარღვევას, რასაც, როგორც ჩანს, აპირებს და თუ საზღვაო ბლოკადა გაგრძელდება, ირანის ისლამური რესპუბლიკა საპასუხოდ საჭირო ზომებს მიიღებს და ეს ეჭვგარეშეა“, - აღნიშნა ირანის საგარეო საქმეთა სამინისტროს პრესსპიკერმა ესმაილ ბაგაიმ.

ცნობისთვის, ირანის საგარეო საქმეთა მინისტრმა აბას არაღჩიმ განაცხადა, რომ ჰორმუზის სრუტე კომერციული გემებისთვის გაიხსნა. აშშ-ის პრეზიდენტმა დაადასტურა, რომ სრუტე გახსნილია, თუმცა დასძინა, რომ საზღვაო ბლოკადა ძალაში რჩება.

„ჰორმუზის სრუტე სრულად გახსნილია და მზად არის ბიზნესისა და სრული გატარებისთვის, თუმცა საზღვაო ბლოკადა სრულად ძალაში დარჩება და იმოქმედებს მხოლოდ ირანთან დაკავშირებით, იქამდე, სანამ ირანთან ჩვენი გარიგება 100%-ით არ დასრულდება“, - დაწერა ტრამპმა სოციალურ ქსელში.