მოკლული ბიზნესმენის, ლევან ჯანგველაძის ოჯახის წევრებმა და ახლობლებმა პროტესტის ნიშნად სასამართლოს სხდომათა დარბაზი, სადაც ამ წუთებში დაცვის მხარე დასკვნით სიტყვას წარმოთქვამს, დატოვეს.

ჯანგველაძის ახლობლების გაღიზიანება ბრალდებულების ერთ-ერთი ადვოკატის დასკვნითმა სიტყვამ გამოიწვია.

როგორც სხდომის დარბაზიდან გამოსვლის შემდეგ აცხადებდნენ, ისინი ვერ მოუსმენდნენ იმ ყველაფერს, რაზეც ადვოკატები საუბრობდნენ.

ბიზნესმენ ლევან ჯანგველაძის შეკვეთით და ანგარებით განზრახ მკვლელობის ორგანიზებაში ბრალდებულების, ძმებ მიქაძეებისა და გიორგი ჯოხაძის საქმეზე თბილისის საქალაქო სასამართლოში დასკვნით სხდომა მიმდინარეობს.

სასამართლოს გარე პერიმეტრზე უსაფრთხოების მიზნით სამართალდამცავები არიან მობილიზებული.

ცნობისთვის, გამოძიება ძმებ გიორგი და დავით მიქაძეებს, ასევე გიორგი ჯოხაძეს ლევან ჯანგველაძის შეკვეთით მკვლელობის ორგანიზებას ედავება.

გიორგი ჯოხაძეს ასევე, გიორგი კაჭკაჭაშვილთან ერთად მართლსაწინააღმდეგოდ ჯგუფურად ცეცხლსასროლი იარაღების შეძენას ედავებიან.

ბიზნესმენ ლევან ჯანგველაძის შეკვეთითა და ანგარებით, განზრახ მკვლელობისთვის და გია ჩადუნელის მკვლელობის მცდელობისთვის მსჯავრდადებულია გელა უძილაური. მას უვადო თავისუფლების აღკვეთა აქვს მისჯილი. აღნიშნული საქმის ფარგლებში ცეცხლსასროლი იარაღის მართლსაწინააღმდეგოდ გასაღების ფაქტზე მსჯავრდებულია სანდრო წივწივაძე, მას 8 წლით თავისუფლების აღკვეთა აქვს მისჯილი.

ამავე საქმის ფარგლებში ბრალდებულია ყოფილი გენერალური პროკურორი, ოთარ რომანოვ-ფარცხალაძე. მას ბრალი საქართველოს სისხლის სამართლის კოდექსის 25/109-ე მუხლის ,,ნ“ ქვეპუნქტით წარუდგინეს, რაც შეკვეთით და ანგარებით განზრახ მკვლელობის ორგანიზებას გულისხმობს.

აღნიშნული დანაშაული სასჯელის სახედ და ზომად 16-დან 20-წლამდე ან უვადო თავისუფლების აღკვეთას ითვალისწინებს.

ოთარ რომანოვ- ფარცხალაძე რუსეთის მოქალაქეა, მის მიმართ საერთაშორისო ძებნაა გამოცხადებული.