„დემოკრატმა“ სენატორებმა დონალდ ტრამპის ადმინისტრაცია რუსული ნავთობის წინააღმდეგ დაწესებული სანქციების შემსუბუქებისთვის გააკრიტიკეს.

სენატორებმა ჯინ შაჰინმა, ჩაკ შუმერმა და ელიზაბეთ უორენმა ერთობლივი განცხადება გამოაქვეყნეს და აშშ-ის ხაზინის დეპარტამენტის მიერ საშეღავათო ნებართვის მოქმედების ვადის გახანგრძლივება დაგმეს, რომლითაც ქვეყნები რუსული ნავთობისა და ნავთობპროდუქტების შეძენას 16 მაისამდე შეძლებენ.

„ეს სამარცხვინო გადაწყვეტილებაა და ხაზინის მდივანი ბესენტის მიერ საკუთარი პოზიციის 180 გრადუსით შემოტრიალებას წარმოადგენს, მაშინ როდესაც, სულ რაღაც ორი დღის წინ პირობა დადო, რომ რუსეთის სანქციების საშეღავათო ნებართვას არ გაახანგრძლივებდა. მიმდინარე კვირაში პუტინმა უკრაინის წინააღმდეგ დღემდე ყველაზე მასშტაბური საჰაერო თავდასხმა განახორციელა, რასაც 18 ადამიანი ემსხვერპლა და ადმინისტრაციის პასუხი კრემლის წინააღმდეგ სანქციების შემსუბუქებაა. რა გზავნილია ეს ნაბიჯი?“, - ნათქვამია სენატორების განცხადებაში.

ასევე, სენატორები აღნიშნავენ, რომ „ირანის წინააღმდეგ პრეზიდენტი ტრამპის ომით ყველაზე მეტად პუტინი სარგებლობს“.

„პრეზიდენტმა ტრამპმა პუტინს საკუთარი თავის გასულელების უფლება არ უნდა მისცეს და მის წინააღმდეგ დამატებითი სანქციები უნდა დააწესოს. თუ პრეზიდენტი ტრამპი კურსს არ შეიცვლის, უკრაინაში ომი გაგრძელდება და კიდევ უფრო მეტი უდანაშაულო ადამიანი დაიღუპება“, - აცხადებენ სენატორები.