დიუშენის კუნთოვანი დისტროფიით დაავადებული ერთ-ერთი ბავშვის მშობლის, კახა წიქარიშვილის განცხადებით, „ქართული ოცნების“ მთავარი დევიზი - „სამართალი და სიცოცხლე“ რეალურად არ სრულდება და ხელისუფლება, ფაქტობრივად, არ აფასებს მძიმე დაავადებების მქონე ბავშვების სიცოცხლეს.

ამის შესახებ წიქარიშვილმა „პალიტრანიუსის“ გადაცემაში „რეზიუმე“ აღნიშნა.

„ქართული ოცნების“ ორი საარჩევნო დევიზი მახსენდება: სამართალი და სიცოცხლე. ადრე რომ იყო გაბრწყინება და აღორძინება - ასეთი დევიზი არ ჰქონია. ამაზე ვხუმრობდი, ყველაზე ადვილი საარჩევნო დევიზია-თქო. ეს მთავარი დევიზი, რაც არჩევნებიდან მოჰყვება „ოცნებას“, ამის საწინააღმდეგოს აკეთებს. ამბობს, რომ ერთი, ორი და სამი წელი სიცოცხლეს არ აქვს არანაირი ფასი - ფულის გადაყრა არ ღირს ამაშიო“,- განაცხადა წიქარიშვილმა.

მან საზოგადოებას მხარდაჭერისთვის მადლობა გადაუხადა და ხაზი გაუსვა, რომ ბოლო დღეებში პრობლემის აქტიურად გაშუქებამ უფრო მეტ ადამიანს დაანახა იმ სირთულეების მასშტაბი, რომლის წინაშეც დაახლოებით 100 ოჯახი დგას.

მისი თქმით, დიუშენის დაავადების მქონე ბავშვების მდგომარეობა იმდენად მძიმეა, რომ ისინი ხშირად ასაკობრივად 87 წლის მოხუცებს ჰგვანან.

„მადლობა საზოგადოებას, რომ ჩვენ გვერდით დგას. განსაკუთრებით, ბოლო დღეებში, როდესაც ეს პრობლემა გახმაურდა, ხალხი მიხვდა რა უბედურებასთან გვაქვს საქმე ამ 100 ოჯახს. როდესაც ბავშვი მოხუცის მდგომარეობაშია. ბავშვი, რომელიც ასაკობრივად 87 წლის მოხუცის მდგომარეობაშია”, - განაცხადა წიქარიშვილმა.

ამასთან, წიქარიშვილი ხელისუფლებას მოუწოდებს დიალოგისკენ და აღნიშნავს, რომ მშობლები მზად არიან კონსტრუქციული თანამშრომლობისთვის.

„ჩვენი ბავშვების პერსონალური მონაცემები ისედაც გამოფენილი გვაქვს, ბავშვები დაგვყავს აქციებზე. გარანტიას ვაძლევთ, რომ მშობლები იქნებიან კონსტრუქციულები. შემოვიდნენ ეთერებში და მშობლები პირობას დადებენ, რომ არანაირი ექსცესები არ იქნება“, - განაცხადა წიქარიშვილმა.