ევროკავშირმა და აშშ-მა კრიტიკულ მინერალებზე სტრატეგიული პარტნიორობა გააფორმეს. ამის შესახებ ინფორმაციას ევროკომისია ავრცელებს.

„დღეს ევროკავშირმა და აშშ-მა კრიტიკულ მინერალებზე სტრატეგიულ პარტნიორობაზე ურთიერთგაგების მემორანდუმს მოაწერეს ხელი და კრიტიკულ მინერალებზე ევროკავშირი-აშშ-ის სამოქმედო გეგმაზე შეთანხმდნენ. ეს ინიციატივები ასახავენ ევროკავშირის მზადყოფნას გააღრმაოს თანამშრომლობა ნედლ კრიტიკულ მასალებზე“, - ნათქვამია განცხადებაში.

შეთანხმებას ვაშინგტონში ევროკავშირის ვაჭრობისა და ეკონომიკური უსაფრთხოების კომისარმა, მაროშ შეფჩოვიჩმა და აშშ-ის სახელმწიფო მდივანმა, მარკო რუბიომ მოაწერეს ხელი.

„სამოქმედო გეგმის თანახმად, ევროკავშირი და აშშ აპირებენ ერთად იმუშაონ სავაჭრო პოლიტიკისა და ინსტრუმენტების ფართო სპექტრის შესწავლაზე, რათა კოორდინირებული საერთაშორისო ქმედებები გააძლიერონ. ეს შეიძლება მოიცავდეს საზღვრების შესაბამისად კორექტირებულ მინიმალურ ფასებს, სტანდარტებზე დაფუძნებულ ბაზრებს, ფასების სხვაობის სუბსიდიებსა და სარეალიზაციო შეთანხმებებს. დამატებით, თანამშრომლობა, სავარაუდოდ, ფოკუსირებული იქნება მოპოვების, გადამუშავებისა და ხელმეორედ გამოყენების საერთო სტანდარტების შემუშავებაზე; ინვესტიციების წახალისებაზე; ერთობლივ კვლევასა და ინოვაციებზე; მარაგების შექმნის სტრატეგიებსა და მიწოდების შეფერხებებზე სწრაფი რეაგირების მექანიზმებზე“, - ნათქვამია განცხადებაში.