დონალდ ტრამპი - ირანთან ომის დასრულების საუკეთესო გეგმა მაქვს - ცეცხლის შეწყვეტის რეჟიმი კი აპარატზეა, ეს ჰგავს იმას, როდესაც ექიმი ამბობს: „ბატონო, თქვენს საყვარელ ადამიანს 1%-იანი შანსი აქვს“
აშშ-ის პრეზიდენტის დონალდ ტრამპის განცხადებით, ირანთან დაკავშირებით საუკეთესო გეგმა აქვს.
ოვალურ კაბინეტში ჟურნალისტების კითხვებზე პასუხის გაცემისას ტრამპმა აღნიშნა, რომ მისი გეგმა „ძალიან მარტივია“.
„მე მაქვს გეგმა - იცით, ეს ძალიან მარტივი გეგმაა. არ ვიცი, რატომ არ ამბობთ ისე, როგორც არის - ირანს არ შეიძლება ბირთვული იარაღი ჰქონდეს. ჩვენ მსოფლიოს სამსახურს ვუწევთ“, - აღნიშნა ტრამპმა.
ამასთან, მისი მტკიცებით, ომის დასრულების შესახებ წინადადება, რომელიც ირანმა აშშ-ს გაუგზავნა, „სისულელეა“.
ტრამპის განცხადებით, აშშ-სა და ირანს შორის ცეცხლის შეწყვეტის შესახებ შეთანხმება ძალიან მყიფე მდგომარეობაშია.
„ვიტყოდი, რომ ცეცხლის შეწყვეტის რეჟიმი მასიურ სიცოცხლის შენარჩუნების აპარატზეა. ეს ჰგავს იმას, როდესაც ექიმი შემოდის და ამბობს: „ბატონო, თქვენს საყვარელ ადამიანს [გადარჩენის] 1%-იანი შანსი აქვს“, - აღნიშნა ტრამპმა.
ამასთან, კითხვაზე, თვლის თუ არა, რომ ომის დიპლომატიური გადაწყვეტა ჯერ კიდევ შესაძლებელია, აშშ-ის პრეზიდენტმა უპასუხა :
„ვფიქრობ, სრულიად შესაძლებელია. მისმინეთ, მე მათთან [ირანელებთან] ოთხჯერ ან ხუთჯერ მქონდა შეთანხმება. მათ აზრი შეიცვალეს. ძალიან უპატიოსნო ხალხია, ხელმძღვანელობა”, - აღნიშნა ტრამპმა.
