პოლონეთის თავდაცვის მინისტრის ვლადისლავ კოსინიაკ-კამიშის განცხადებით, აშშ-ს პოლონეთში ამერიკელი სამხედროების განლაგების შესახებ მიღებული გადაწყვეტილება არ გაუუქმებია.

პოლონეთის თავდაცვის მინისტრი ამერიკული გამოცემების მიერ გავრცელებულ ინფორმაციას გამოეხმაურა, იმის შესახებ, რომ აშშ-მა პოლონეთში 4000-ზე მეტი სამხედრო მოსამსახურის განლაგების გადაწყვეტილება მოულოდნელად გააუქმა.

„ეს საკითხი პოლონეთს არ ეხება და ის ევროპაში აშშ-ის შეიარაღებული ძალების ნაწილების განლაგების შესახებ ადრე გამოცხადებულ ცვლილებას უკავშირდება. პოლონეთის შეიარაღებული ძალების პოტენციალის სწრაფი ზრდა და პოლონეთში აშშ-ის ჯარების ყოფნა ნატო-ს აღმოსავლეთ ფლანგს აძლიერებს“, - წერს პოლონეთის თავდაცვის მინისტრი X-ზე.

ასევე, პოლონეთის თავდაცვის მინისტრის მოადგილემ, ცეზარი ტომჩიკმაც განაცხადა, რომ ინფორმაცია „სიმართლეს არ შეესაბამება“.

„ეს ინფორმაცია გერმანიას ეხება და არა პოლონეთს“, - აღნიშნა პოლონეთის თავდაცვის მინისტრის მოადგილემ.

შეგახსენებთ, მიმდინარე თვის დასაწყისში პენტაგონმა გერმანიიდან, მომდევნო ექვსიდან თორმეტ თვემდე პერიოდის განმავლობაში, 5000 ამერიკელი სამხედრო მოსამსახურის გაყვანის შესახებ გამოაცხადა. პენტაგონმა გადაწყვეტილების შესახებ მას შემდეგ გამოაცხადა, რაც დონალდ ტრამპმა გერმანიის კანცლერი, ფრიდრიხ მერცი ირანში ომთან დაკავშირებით მისი პოზიციის გამო რამდენჯერმე გააკრიტიკა და სოციალურ ქსელში დაწერა, რომ აშშ გერმანიაში განლაგებული ამერიკელი სამხედროების რაოდენობის შემცირებას განიხილავდა.