იემენის სანაპიროსთან სატვირთო გემზე თავდასხმა განხორციელდა, - ინფორმაციას The Guardian-ი ავრცელებს.

„გაერთიანებული სამეფოს საზღვაო სავაჭრო ოპერაციების“ სააგენტოს (UKMTO) ცნობით, იემენის სანაპიროსთან სატვირთო გემს პატარა ნავი მიუახლოვდა, საიდანაც გემს შეიარაღებულმა პირებმა ცეცხლი გაუხსნეს.

მათივე თქმით, ნავს სატვირთო გემის დაცვამ საპასუხო ცეცხლი დაუბრუნა და თავდასხმა მოიგერია.

„ცეცხლის გაცვლის შემდეგ ნავი უკან გაბრუნდა“, - განაცხადა UKMTO-მ.

თავდასხმაზე პასუხისმგებლობა ჯერჯერობით არცერთ დაჯგუფებას არ აუღია, თუმცა, ორშაბათს იემენელმა „ჰუსიტებმა“ განაცხადეს, რომ წითელ ზღვაში ისრაელთან დაკავშირებულ გემებზე თავდასხმებს განაახლებდნენ.