12 ივნისს, „დინამო არენაზე“ დაგეგმილი კანიე ვესტის კონცერტის გამო, თბილისის მეტრო და ასევე ავტობუსები, რომლებიც აღნიშნულ ტერიტორიაზე მოძრაობენ, გახანგრძლივებულად იმუშავებენ და მგზავრებს 13 ივნისის ღამის 02:00 საათამდე მოემსახურებიან.

როგორც დედაქალაქის მერმა, კახა კალაძემ აღნიშნა, 12 ივნისს, 07:00 საათიდან საავტომობილო გადაადგილება ასევე შეიზღუდება სტადიონის მიმდებარე ქუჩებზე.

„როგორც იცით, 12 ივნისს, „დინამო არენაზე“ დაგეგმილია კანიე ვესტის კონცერტი, რომელსაც საქართველოში ძალიან ბევრი გულშემატკივარი ჰყავს. მსმენელებს შეუფერხებლად გადაადგილების მიზნით, თბილისის მეტრო და ასევე ავტობუსები, რომლებიც აღნიშნულ ტერიტორიაზე მოძრაობენ, გახანგრძლივებულად იმუშავებენ, მგზავრებს 13 ივნისის ღამის 02:00 საათამდე მოემსახურებიან.

რაც შეეხება საგზაო მოძრაობას, 12 ივნისს, 07:00 საათიდან საავტომობილო გადაადგილება შეიზღუდება სტადიონის მიმდებარე ქუჩებზე.

პირველადი შეზღუდვა შეეხება სლავა მეტრეველის და გიორგი ცაბაძის ქუჩებს, სადაც გადაადგილება შეზღუდული იქნება „დინამო არენის“ მთავარ შესასვლელების მიმდებარე ტერიტორიაზე. შეზღუდვის პერიოდში, ავტომობილები გადაადგილებას შეძლებენ მიმდებარე ქუჩების გამოყენებით“,- განაცხადა კალაძემ.