„საქართველოს რკინიგზის” საქმეზე ერთ-ერთი ბრალდებულის, რევაზ რევაზიშვილის განცხადებით, მზად არის, ზიანის ანაზღაურებისთვის.

რევაზიშვილმა პროცესზე აღნიშნა, რომ გამოძიებასთან 2025 წლიდან თანამშრომლობს და “მჭიდრო კომუნიკაცია აქვს”. ის ბრალს აღიარებს.

მან ასევე განაცხადა, რომ საერთოდ არ იცნობს ბრალდებულებს და პირველად ხედავს.

რევაზიშვილის ადვოკატის თქმით, მისი დაცვის ქვეშ მყოფის მიმართ აღკვეთის ღონისძიების სახით არცერთი ღონისძიება არ უნდა იქნას გამოყენებული.

ამასთან, ადვოკატმა მოსამართლეს ალტერნატივის სახით 30 000 ლარის ოდენობის გირაო შესთავაზა.

ცნობისთვის, სუს-ის ანტიკორუფციულმა სამსახურმა სააქციო საზოგადოება „საქართველოს რკინიგზის“ ყოფილი გენერალური დირექტორი დავით ფერაძე და კიდევ 7 პირი სისხლისსამართლებრივ პასუხისგებაში მისცა. მათგან 2-ზე, მათ შორის დავით ფერაძეზე ძებნა გამოცხადდა, დანარჩენები კი თბილისში, მოსამართლის განჩინების საფუძველზე დააკავეს.

გამოძიება მიმდინარეობს საქართველოს სისხლის სამართლის კოდექსის 180-ე მუხლის მე-3 ნაწილის „ა“ და „ბ“ ქვეპუნქტებით, მე-4 ნაწილის „ა“ ქვეპუნქტით, 194-ე მუხლის მე-3 ნაწილის „ა“ და „გ“ ქვეპუნქტებით, 210-ე მუხლის მე-2 ნაწილის „ა“ ქვეპუნქტით, ასევე, 25, 180-ე მუხლის მე-3 ნაწილის „ა“ და „ბ“ ქვეპუნქტებით, 25, 362-ე მუხლის მე-2 ნაწილის „ბ“ ქვეპუნქტით და 362-ე მუხლის მე-2 ნაწილის „ბ“ ქვეპუნქტით, რაც სასჯელის სახით ითვალისწინებს თავისუფლების აღკვეთას 9-დან 12 წლამდე ვადით. სახელმწიფო უსაფრთხოების სამსახურის ანტიკორუფციულ სააგენტოში გრძელდება აქტიური საგამოძიებო მოქმედებები ორგანიზებული ჯგუფის სხვა წევრების გამოვლენისა და მათ მიმართ კანონმდებლობით გათვალისწინებული ზომების განხორციელების მიზნით.

დაკავებული პირები არიან: ანზორ ჯამალაშვილი, რევაზ რევაზიშვილი, გიორგი კურტანიძე, მალხაზ ომარაშვილი, გიორგი მარუქაშვილი, ალექსანდრე ტორიაშვილი. ძებნაში იმყოფება დავით ფერაძე და კიდევ ერთი პირი.