„საქართველოს რკინიგზის“ საქმეზე დაკავებულ ექვს პირს აღკვეთის ღონისძიების სახით პატიმრობა შეეფარდა, ყოფილ გენერალურ დირექტორს, დავით ფერაძეს და ერთ პირს დაუსწრებლად.

გადაწყვეტილება თბილისის საქალაქო სასამართლოს მოსამართლემ ეკა ბარბაქაძემ მიიღო.

მოსამართლის განცხადებით, წინასასამართლო სხდომა 10 აგვისტოს, 12:00 საათზე გაიმართება.

ბრალდების მხარემ პროცესზე აღკვეთის ღონისძიების სახით პატიმრობის შეფარდების შუამდგომლობა დააყენა.

პროკურორ ანი ლეკიაშვილის განცხადებით, არსებობს ბრალდებულთა მიერ ახალი დანაშაულის ჩადენის, მოწმეებზე ზემოქმედებისა და მტკიცებულებების განადგურების საფრთხე.

ბრალდებულთა ადვოკატებმა პროცესზე განაცხადეს, რომ აღკვეთის სახით არცერთი ღონისძიება არ უნდა იქნას გამოყენებული.

ამასთან, გიორგი კურტანიძის ადვოკატმა მოსამართლეს ალტერნატივის სახით 20 ათასი ლარის, ხოლო გიორგი მარუქაშვილის ადვოკატმა 10 ათასი ლარის, რევაზ რევაზიშვილის ადვოკატმა 30 ათასი ლარის გირაოს გამოყენება შესთავაზა.

მისი თქმით, არც ფაქტობრივი და არც ფორმალური საფუძველი არ არსებობს რომ გამოყენებული იქნას რაიმე სახის აღკვეთის ღონისძიება.

დავით ფერაძის ადვოკატმა განაცხადა, რომ გირაოს თანხა თავად განსაზღვროს სასამართლომ.

მალხაზ ომარაშვილის ადვოკატმა მოსამართლეს ალტერნატივად 5 ათასი ლარის ოდენობით გირაო და სხვა დამატებითი ღონისძიებების დაკისრება შესთავაზა.

ცნობისთვის, სუს-ის ანტიკორუფციულმა სამსახურმა სააქციო საზოგადოება „საქართველოს რკინიგზის“ ყოფილი გენერალური დირექტორი დავით ფერაძე და კიდევ 7 პირი სისხლისსამართლებრივ პასუხისგებაში მისცა. მათგან 2-ზე, მათ შორის დავით ფერაძეზე ძებნა გამოცხადდა, დანარჩენები კი თბილისში, მოსამართლის განჩინების საფუძველზე დააკავეს.

გამოძიება მიმდინარეობს საქართველოს სისხლის სამართლის კოდექსის 180-ე მუხლის მე-3 ნაწილის „ა“ და „ბ“ ქვეპუნქტებით, მე-4 ნაწილის „ა“ ქვეპუნქტით, 194-ე მუხლის მე-3 ნაწილის „ა“ და „გ“ ქვეპუნქტებით, 210-ე მუხლის მე-2 ნაწილის „ა“ ქვეპუნქტით, ასევე, 25, 180-ე მუხლის მე-3 ნაწილის „ა“ და „ბ“ ქვეპუნქტებით, 25, 362-ე მუხლის მე-2 ნაწილის „ბ“ ქვეპუნქტით და 362-ე მუხლის მე-2 ნაწილის „ბ“ ქვეპუნქტით, რაც სასჯელის სახით ითვალისწინებს თავისუფლების აღკვეთას 9-დან 12 წლამდე ვადით.

სახელმწიფო უსაფრთხოების სამსახურის ანტიკორუფციულ სააგენტოში გრძელდება აქტიური საგამოძიებო მოქმედებები ორგანიზებული ჯგუფის სხვა წევრების გამოვლენისა და მათ მიმართ კანონმდებლობით გათვალისწინებული ზომების განხორციელების მიზნით.