აზერბაიჯანელი ჟურნალისტი, აფგან სადიგოვი ბაქოს სააპელაციო სასამართლომ პატიმრობაში დატოვა. ამის შესახებ ჟურნალისტის ცოლი, სევინჯ სადიგოვა სოციალურ ქსელში წერს.

მისი თქმით, აღნიშნული გადაწყვეტილება სასამართლოს დამოუკიდებელი პოზიციის შედეგი არ არის და იგი ქვეყნის მმართველი სისტემის მიდგომას ასახავს.

„სააპელაციო სასამართლომ გადაწყვეტილება არ შეცვალა. აფგან სადიგოვის საჩივარი არ დაკმაყოფილდა. დაპატიმრების შესახებ გადაწყვეტილება ძალაში დარჩა. აფგან სადიგოვის წინასწარი პატიმრობის საკითხზე შეტანილი საჩივარი ბაქოს სააპელაციო სასამართლომ არ დააკმაყოფილა. ილჰამ ალიევის ხელმძღვანელობით მოქმედ სისტემაში ეს გადაწყვეტილება უფრო სისტემის არსს გამოხატავს, ვიდრე მოსამართლის დამოუკიდებელ არჩევანს. ეს არ გამკვირვებია“,- წერს სევინჯ სადიგოვა.

შეგახსენებთ, საქართველოს შინაგან საქმეთა სამინისტრომ აზერბაიჯანელი ჟურნალისტი აფგან სადიგოვი 2026 წლის 5 აპრილს, ადმინისტრაციული წესით დააკავა. შსს-ს ცნობით, ის სოციალურ ქსელში პოლიციელის მიმართ შეურაცხყოფისთვის იქნა დაკავებული. იმავე დღეს სახდელის სახით შეეფარდა ჯარიმა 2000 ლარის ოდენობით, საქართველოდან გაძევება და ქვეყანაში შემოსვლის აკრძალვა 3 წლის ვადით.

მაისში ცნობილი გახდა, რომ აზერბაიჯანელი ჟურნალისტი, აფგან სადიგოვი ბაქოში დააპატიმრეს. „სოციალური სამართლიანობის ცენტრის" დირექტორის, ადვოკატ თამთა მიქელაძის ცნობით, აზერბაიჯანელი ჟურნალისტი, აფგან სადიგოვი ბაქოში დაპატიმრებულია იმავე საქმეზე, რომლის საფუძველზეც აზერბაიჯანი მის ბაქოში ექსტრადიციას ითხოვდა.