მოსამართლემ სცადა მენტორული ტონით აეხსნა საკუთარი გადაწყვეტილების საფუძვლები, თუმცა ამ განმარტებებში მან ბევრი ტყუილი თქვა, - ასე გამოეხმაურა 4 ოქტომბერს განვითარებულ მოვლენებთან დაკავშირებით მსჯავრდებულ ანტონ ვარდანიძის ადვოკატი, დიმიტრი საძაგლიშვილი მოსამართლე რომეო ტყეშელაშვილის მიერ გამოტანილ გამამტყუნებელ განაჩენსა და მის მიერ გაკეთებულ განმარტებას.

როგორც ადვოკატი აღნიშნავს, სასამართლო ფაქტების დამახინჯებით შეეცადა „უკანონო განაჩენის“ გამართლებას.

„ჩვენ ვიხილეთ ის, რაც ისედაც მოსალოდნელი იყო, უკვე სტანდარტი დამკვიდრდა, რომ მოსამართლეებმა 4 ოქტომბრის საქმესთან დაკავშირებით 5- წლიანი პატიმრობები უნდა ჩამოარიგონ. მოსამართლემ სცადა მენტორული ტონით აეხსნა საკუთარი გადაწყვეტილების საფუძვლები, თუმცა ამ განმარტებებში მან ბევრი ტყუილი თქვა. დაჭრილ პოლიციელებზე ისაუბრა, მაგრამ საქმის განხილვისას მოწმის სახით დაკითხული პოლიციელები ვნახეთ, რომლებმაც მათივე განმარტებებით დაზიანებები მიიღეს იმდენად მცირე, რომ სამედიცინო მომსახურებაც არ დასჭირვებიათ. რეალურად, სასამართლო შეეცადა ფაქტების დამახინჯებით გაემართლებინა თავისი უკანონო განაჩენი და ისეთი განმარტებები გაეკეთებინა, რომ ამ ქვეყანაში საპროტესტო პოზიციის დაფიქსირება, საპროტესტო აქციებში მონაწილეობის მიღება დასჯადია, სწორედ ბიძინა ივანიშვილის წინააღმდეგ საკუთარი პოზიციის დაფიქსირებაა დასჯადი“, - განაცხადა საძაგლიშვილმა.

ცნობისთვის, 4 ოქტომბერს განვითარებულ მოვლენებთან დაკავშირებით ერთ-ერთ ეპიზოდზე ბრალდებული 8 პირი - ზურაბ ჭავჭანიძე, ვლადიმერ გველესიანი, ამირან დოლიშვილი, ანტონ ვარდანიძე, ალექსანდრე ჩილაჩავა, გენადი კუპრეიშვილი, სულხან ტუღუში და რამაზ მამულაძე სასამართლომ დამნაშავედ ცნო. თბილისის საქალაქო სასამართლოს მოსამართლე, რომეო ტყეშელაშვილის გადაწყვეტილებით, რვავე პირს, მათ შორის, ზურაბ ჭავჭანიძეს 5-5 წლით თავისუფლების აღკვეთა მიესაჯა.