აუდიტის სამსახური ვერ დაიბარებს რომელიმე გამგებელს და ვერ დაუწყებს კითხვების დასმას - თუ მომანიჭებთ ასეთ უფლებამოსილებას, გარწმუნებთ, რეკომენდაციების შესრულების პროცენტი შეიცვლება, თან რადიკალურად, - ამის შესახებ საქართველოს გენერალურმა აუდიტორმა, გიორგი გაბიტაშვილმა პარლამენტის პლენარულ სხდომაზე განაცხადა, რითაც აუდიტის სამსახურის მიერ გაცემული რეკომენდაციების შეუსრულებლობის მაჩვენებელთან დაკავშირებით, პარტია „გახარია საქართველოსთვის“ დეპუტატების კითხვას უპასუხა.

მისივე თქმით, აუდიტის სამსახურს მის მიერ გაცემული რეკომენდაციების შესრულების ბერკეტები არ გააჩნია.

„რეკომენდაციების შეუსრულებლობის 41%-ზე საუბრობდით. რატომ არ სრულდება და ამაში თქვენ უნდა დაგვეხმაროთ - პარლამენტი და აღმასრულებელი ხელისუფლება. აუდიტის სამსახური ვერ დაიბარებს რომელიმე გამგებელს და ვერ დაუწყებს კითხვების დასმას. ასეთი უფლებამოსილება არ გვაქვს, თორემ კითხვების დასმა ძალიან კარგად ვიცი წინა პროფესიიდან გამომდინარე. თუ მომანიჭებთ ასეთ უფლებამოსილებას, გარწმუნებთ, რეკომენდაციების შესრულების პროცენტი შეიცვლება, თან რადიკალურად. ესაა ჩემი პასუხი და დავასრულოთ, რატომ ვერ სრულდება რეკომენდაციები. არ მაქვს სათანადო ბერკეტები და როგორ შევასრულებ?! მომეცით ბერკეტი და შევასრულებ! რომ მქონდეს [ბერკეტი], აუცილებლად გამოვიყენებდი,“ - განაცხადა გაბიტაშვილმა.