უკრაინამ და შვედეთმა 16 Gripen E ავიაგამანადგურებლის შესყიდვის თაობაზე შეთანხმება გააფორმეს. ამის შესახებ

ინფორმაციას უკრაინის პრეზიდენტის პრესსამსახური ავრცელებს.

“სახელმწიფოს მეთაურისა და უკრაინისა და შვედეთის თავდაცვის მინისტრების თანდასწრებით, დოკუმენტს ხელი მოაწერეს უკრაინის თავდაცვის მინისტრის მოადგილემ, სერგეი ბოევმა და შვედეთის თავდაცვითი მასალების ადმინისტრაციის გენერალურმა მდივანმა, მიკაელ გრანჰოლმმა”, - ნათქვამია განცხადებაში.

როგორც აღინიშნება, 16 Gripen E თვითმფრინავების მიწოდება 2029 წლის დასაწყისში დაიწყება. შესყიდვა ევროკავშირის სესხითა და დიდი ბრიტანეთის მხარდაჭერით დაფინანსდება.

“შეთანხმების თანახმად, უკრაინა ასევე მიიღებს თვითმფრინავებისთვის აღჭურვილობას, ტექნიკურ დახმარებასა და ლოგისტიკის საკითხებში მხარდაჭერას. შვედეთში უკვე მიმდინარეობს უკრაინელი პილოტებისა და ტექნიკური პერსონალის წვრთნა”, - ნათქვამია განცხადებაში.

ამას გარდა, 2027 წლის დასაწყისში უკრაინა შვედეთისგან პირველ 16 Gripen C/D თვითმფრინავს მიიღებს, როგორც სამხედრო დახმარებას. შვედეთის თავდაცვის მინისტრის თქმით, Gripen თვითმფრინავების მიწოდების თაობაზე გადაწყვეტილება გარდამტეხი მომენტია უკრაინის საჰაერო ძალების კონცეფციისთვის.