დღეს, საჭადრაკო კლუბში „მერანი", რელიგიურ ორგანიზაციებს შორის ჭადრაკში საქართველოს მეხუთე გუნდური ჩემპიონატი დასრულდა. ჩემპიონატის ორგანიზატორები საქართველოს ჭადრაკის ფედერაცია და რელიგიის საკითხთა სახელმწიფო სააგენტო არიან.

რელიგიის საკითხთა სახელმწიფო სააგენტოს ინფორმაციით, ჩემპიონატში მონაწილეობდნენ: საქართველოს სამოციქულო ავტოკეფალური მართლმადიდებელი ეკლესიის, საქართველოს მუსლიმთა სამმართველოს, სომეხთა სამოციქულო ეკლესიის საქართველოს ეპარქიის, ლათინ კათოლიკეთა კავკასიის სამოციქულო ადმინისტრაციის, საქართველოს ქრისტიან-ბაპტისტთა ეკლესიების გაერთიანების, საქართველოს ევანგელურ-ლუთერული ეკლესიის, საქართველოს სახარების რწმენის ეკლესიის, საქართველოს ეზიდთა სასულიერო საბჭოსა და რელიგიის საკითხთა სახელმწიფო სააგენტოს გუნდები.

ჩემპიონატის შედეგების მიხედვით, პირველი ადგილი საქართველოს სამოციქულო ავტოკეფალური მართლმადიდებელი ეკლესიის გუნდმა მოიპოვა. მეორე ადგილზე სომეხთა სამოციქულო ეკლესიის საქართველოს ეპარქიის გუნდი გავიდა, მესამე ადგილი კი საქართველოს სახარების რწმენის ეკლესიის გუნდმა დაიკავა.

მონაწილეებს სერტიფიკატები, თასები და სამახსოვრო საჩუქრები გადაეცათ.