რუსებმა კიევზე სარაკეტო იერიში მიიტანეს, არიან დაღუპულები და დაშავებულები
რუსულმა ძალებმა წუხელ უკრაინის დედაქალაქ კიევზე ბალისტიკური რაკეტებით მასშტაბური თავდასხმა განახორციელეს, - ინფორმაციას უკრაინული მედია ავრცელებს.
კიევის მერის, ვიტალი კლიჩკოს, განცხადებით, პოდილსკის რაიონში რუსულმა რაკეტამ ცხრასართულიან საცხოვრებელ შენობას დაარტყა და ნაწილობრივ გაანადგურა.
„პოდილსკის რაიონში საცხოვრებელი შენობა ნაწილობრივ განადგურდა. მე-7 და მე-9 სართულებს შორის ხალხია ჩარჩენილი“, - აღნიშნა კლიჩკომ.
მისი თქმით, ჩამოგდებული რაკეტის ნამსხვრევები დედაქალაქის სხვადასხვა რაიონში ჩამოვარდა. ამ დროისთვის არსებული ინფორმაციით, დაიღუპა 3 ადამიანი და დაშავდა 7.
ცნობისთვის, უკრაინის პრეზიდენტმა ვოლოდიმირ ზელენსკიმ გუშინ საღამოს განაცხადა, რომ უკრაინის დაზვერვის ინფორმაციით, რუსეთი ქვეყანაზე ახალი მასშტაბური თავდასხმისთვის ემზადება.
