ურსულა ფონ დერ ლაიენის გარდა, კიევში რამდენიმე ქვეყნის ლიდერები ჩავიდნენ
უკრაინის დედაქალაქ კიევში დღეს დილით ევროპის რამდენიმე ქვეყნის ლიდერები ჩავიდნენ, - ინფორმაციას უკრაინული მედია ავრცელებს.
„კიევი უკრაინის სახელმწიფოებრიობის დღეს პატივსაცემ მაღალი რანგის სტუმრებს მასპინძლობს. ევროკომისიის პრეზიდენტი ურსულა ფონ დერ ლაიენი და სამხრეთ-აღმოსავლეთ ევროპის ლიდერები პროდუქტიული მოლაპარაკებებისთვის პრეზიდენტ ვოლოდიმირ ზელენსკის შეხვდებიან“, - განაცხადა უკრაინის საგარეო საქმეთა მინისტრმა ანდრეი სიბიგამ.
მისი ინფორმაციით, ევროკავშირისკენ მიმავალ გზაზე პარტნიორობისა და თანამშრომლობის კიდევ ერთხელ დასადასტურებლად, უკრაინა უკრაინა-სამხრეთ-აღმოსავლეთ ევროპის მეხუთე სამიტს უმასპინძლებს.
„სხვა თემებთან ერთად ყურადღების ცენტრშია: ევროპის გაძლიერების მიზნით ერთობლივი მუშაობა, მრავალმხრივი პოლიტიკური ურთიერთობა და უსაფრთხოებისა და თავდაცვის თანამშრომლობის გაძლიერება“, - აღნიშნა სიბიგამ.
უკრაინული მედიის მიერ გავრცელებულ ფოტოებში ჩანან: რუმინეთის პრეზიდენტი ნიკუსორ დანი, მოლდოვას პრეზიდენტი მაია სანდუ, სერბეთის პრეზიდენტი ალექსანდარ ვუჩიჩი, ხორვატიის პრემიერ-მინისტრი ანდრეი პლენკოვიჩი, ალბანეთის პრეზიდენტი ბაირამ ბეგაი და სლოვენიის პრემიერ-მინისტრი იანეზ იანშა.
უკრაინის დედაქალაქში ასევე ჩავიდნენ მაკედონიის საგარეო საქმეთა მინისტრი ნიკოლა დიმიტროვი და მონტენეგროს ვიცე-პრემიერი საგარეო და ევროპულ საკითხებში ფილიპ ივანოვიჩი.
უკრაინაში იმყოფება ევროკომისიის პრეზიდენტი ურსულა ფონ დერ ლაიენიც.
