ქართული ბიზნესის უდიდესი ნაწილი აქტიურად ინტერესდება ახალი ტექნოლოგიებით - კომპანიების 47% ხელოვნური ინტელექტის დანერგვის კვლევის ან დაგეგმვის ეტაპზეა, ხოლო 13%-ს ის უკვე სრულად აქვს ინტეგრირებული ერთ ან რამდენიმე ბიზნესპროცესში - ამის შესახებ საქართველოს ბიზნესასოციაციის მიერ 2026 წლის მეორე კვარტალში ჩატარებული სპეციალური კვლევის შედეგებშია ნათქვამი, რომლის მიზანიც წევრ კომპანიებში ხელოვნური ინტელექტის (AI) ინტეგრაცია და ბიზნესპროცესებზე მისი გავლენის შესწავლა იყო.

როგორც ბიზნესასოციაციის მიერ გავრცელებულ ინფორმაციაშია ნათქვამი, გამოკითხული კომპანიები ხელოვნურ ინტელექტს ყველაზე ხშირად მარკეტინგის და კონტენტის შექმნის მიზნით იყენებენ. შემდეგ თანაბარი წილით მოდის ფინანსებისა და რისკების მართვა და მომხმარებელთა მხარდაჭერის სერვისი.

„სექტორების მიხედვით, მარკეტინგისა და კონტენტის შექმნისთვის ხელოვნური ინტელექტის გამოყენება ყველაზე მეტად ვაჭრობის (26%) და მომსახურების (23%) სექტორებშია გავრცელებული. ფინანსებისა და რისკების მართვის მიმართულებით ხელოვნურ ინტელექტს ყველაზე ხშირად მშენებლობის სექტორი იყენებს (25%), ხოლო მომხმარებელთა მხარდაჭერისთვის - მომსახურების სექტორი (26%).

რაც შეეხება ხელოვნური ინტელექტის გადაწყვეტილებებს, გამოკითხული კომპანიების 50% იყენებს მზა, გლობალურ პლატფორმებს, 26% - შიდა რესურსებით დატრენინგებულ საკუთარ AI მოდელებს, ხოლო 24% - სპეციალიზებულ პროგრამულ უზრუნველყოფას.

გამოკითხულმა კომპანიებმა ასევე, შეაფასეს ხელოვნური ინტელექტის (AI) გავლენა მათ საქმიანობაზე. რესპონდენტთა უმრავლესობისთვის მთავარ პოზიტიურ შედეგს დროის დაზოგვა და პროცესების დაჩქარებაა წარმოადგენს (79%). გამოკითხულთა 11%-ის აზრით, AI-ს დანერგვამ ადამიანური შეცდომები შეამცირა, ხოლო 5%-ის შეფასებით – მომსახურებისა და/ან პროდუქტის ხარისხი გააუმჯობესა.

აღსანიშნავია, რომ საქართველოში ხელოვნური ინტელექტის დანერგვის უმთავრეს შემაფერხებელ ფაქტორად სპეციალისტების დეფიციტი (30%) სახელდება. მას მოჰყვება ქართული ენის მხარდაჭერის ნაკლებობა ტექნოლოგიებში და მონაცემების სიმცირე ან გაუმართავი სტრუქტურა.

მიუხედავად ბარიერებისა, სამომავლო პერსპექტივა პოზიტიურია, კომპანიების 65% მომდევნო 1-2 წელიწადში საინვესტიციო ბიუჯეტის გაზრდას გეგმავს, 16% შეინარჩუნებს მას არსებულ ნიშნულზე, ხოლო მხოლოდ 18% არ გეგმავს ბიუჯეტის გამოყოფას“,- ნათქვამია ინფორმაციაში.