უკრაინის წინააღმდეგ მასირებული დარტყმების გამო ევროკავშირმა რუსეთის წინააღმდეგ სასანქციო სია გააფართოვა. ამის შესახებ განცხადებას ევროკავშირის საბჭო ავრცელებს.

ევროკავშირის საბჭომ პარასკევს, 17 ივლისს, გადაწყვეტილება მიიღო სანქციები შემოიღოს ერთი ფიზიკური და ხუთი იურიდიული პირის მიმართ უკრაინის წინააღმდეგ მასირებული რუსული დარტყმების საპასუხოდ, კერძოდ

კი კიევის წინააღმდეგ 1-2 და 5 ივლისს განხორციელებული თავდასხმებისთვის.

სუბიექტები, რომელთა წინააღმდეგაც იქნა შემოღებული სანქციები, რუსეთის სამხედრო-სამრეწველო კომპლექსის შემადგენლობაში შედიან და კონკრეტულად კი დრონების წარმოებით არიან დაკავებულნი.

სიაში შეყვანილი ხუთივე იურიდიული პირი ABS Electro კომპანიათა ჯგუფში შედიან, რომელიც ავითარებს და აწარმოებს ელექტრონულ და რადიოელექტრონულ კომპონენტებს, რომლებიც დრონების გამოყენებით საბრძოლო ქმედებების საწარმოებლადაა საჭირო.

ეს იურიდიული პირები ხელს უწყობენ სისტემების განვითარებას, რომლებიც რუსული დრონების - როგორებიცაა "შაჰედისა" და "გერანის" ტიპის დრონები - საბრძოლო შესაძლებლობებს ზრდიან რადიოელექტრონული ბრძოლის საშუალებებისადმი მათი გამძლეობის გაზრდის ხარჯზე.

ამას გარდა, რამდენიმე კომპანია მართვის ავტომატიზებულ სისტემებს აწარმოებს რუსული ენერგეტიკული სექტორისთვის, რაც შემოსავლის მნიშვნელოვანი წყაროა რუსეთის მთავრობისთვის.