როდესაც რუსეთმა ჩვენი ქვეყნის წინააღმდეგ აგრესია განახორციელა, მაშინ გლობალური ძალების დღის წესრიგში რუსეთის “გაშავება" არ იდგა და აგენტურაც იმგვარად იქცეოდა, როგორი დავალებაც იყო - სხვა მესიჯბოქსი მიიღო აგენტურამ უკრაინაზე აგრესიის შემდეგ, - ამის შესახებ დღეს ფრაქცია “ქართული ოცნების" დეპუტატმა ლევან მაჭავარიანმა განაცხადა.

მაჭავარიანის თქმით, “აგენტურული ოპოზიცია მდიდარ „ენჯეოებთან“ ერთად, აბსოლუტურად დამოკიდებულია გარე ძალების მითითებებზე, კარნახზე, მესიჯბოქსზე და რასაც ეუბნებიან, ზუსტად იმგვარად მოქმედებენ".

“როდესაც რუსეთმა ჩვენი ქვეყნის წინააღმდეგ აგრესია განახორციელა, მაშინ გლობალური ძალების მხრიდან დღის წესრიგში არ იდგა რუსეთის გაშავება. ამაზე ყველაზე კარგად მეტყველებს, აგვისტოს ომიდან სულ რამდენიმე ხანში აშშ-ს მიერ რუსეთთან ურთიერთობის გადატვირთვა. ასევე, ომიდან სულ რამდენიმე თვეში, როდესაც მოსკოვში სამხედრო აღლუმი იმართებოდა, იქ ევროკავშირის წამყვანი ქვეყნის ლიდერები იმყოფებოდნენ. შესაბამისად, აგენტურასაც დავალება სხვანაირად ჰქონდა ჩაშლილი და იმგვარად იქცეოდნენ, როგორიც იყო დავალება, რადგან მათ უფლება არა აქვთ, რომ სხვანაირად იფიქრონ და სხვა რიტორიკით გაავრცელონ ნარატივი.

ისინი რუსებს საზღვარზე ხვდებოდნენ. ამბობდნენ, რომ რუსი ტურისტები ძალიან მნიშვნელოვანია ჩვენი ქვეყნისთვის. ჩვენი სტრატეგიული ობიექტები რუსეთის სახელმწიფოს მფლობელობაში არსებულ კომპანიებს გადაუფორმეს და რუსეთს მისცეს გადამწყვეტი ხმა მსოფლიო სავაჭრო ორგანიზაციაში გასაწევრიანებლად. ასევე, სამარცხვინო რეზოლუციას მოაწერეს ხელი და ჩვენს გმირ სამხედროებს ომის დაწყება და ომის დანაშაულების ჩადენა დააბრალეს.

როდესაც დღის წესრიგი შეიცვალა და გლობალური ძალებისთვის უკვე მნიშვნელოვანი გახდა რუსების და რუსეთის გაშავება, მანდ უკვე სხვა მესიჯბოქსი მიიღო აგენტურამ. ეს მესიჯბოქსი ჩაიშალა მას შემდეგ, რაც აგრესია უკრაინაზე განხორციელდა.

შესაბამისად, ეს აგენტურული ოპოზიცია თავის მდიდარ „ენჯეოებთან“ ერთად, რა თქმა უნდა, აბსოლუტურად დამოკიდებულია გარე ძალების მითითებებზე, კარნახზე, მესიჯბოქსზე და როგორც ეუბნებიან და რასაც ეუბნებიან, ზუსტად იმგვარად მოქმედებენ,“ - განაცხადა ლევან მაჭავარიანმა.