ზუგდიდის მუნიციპალიტეტში, სოფელ ყულიშკარში, საცხოვრებელ სახლში სამი ადამიანის ცხედარი იპოვეს. გარდაცვლილები დები არიან. გარდაცვლილთა ცხედრები ექსპერტიზის ბიუროში გადაასვენეს.

გარდაცვალების ზუსტი მიზეზი უცნობია, თუმცა ერთ-ერთ ვერსიად საკვებით ინტოქსიკაცია სახელდება.

სოფელ ყულიშკარის გამგებლის ლაშა შველიძის ინფორმაციით, გარდაცვლილი დები მარტო ცხოვრობდნენ და ისინი დაახლოებით 4-5 დღე არ გამოჩენილან. „გარდაცვლილია 3 პიროვნება. რით არიან გარდაცვლილი, ამას ექსპერტიზა დაადგენს. დები იყვნენ. მარტო ცხოვრობდნენ.... დაახლოებით 4-5 დღე არ გამოჩენილან, მეზობელმა ჭიშკართან სუნი იგრძნო“, - განუცხადა ლაშა შველიძემ "ტვ პირველს".

რაც შეეხება გარდაცვალების ერთ-ერთ ვერსიად საკვებით ინტოქსიკაციის დასახელებას, გამგებელმა განმარტა, რომ ექსპერტიზას წაღებული აქვს საჭმლის, წყლის ნიმუშიც და დაადგენს გარდაცვალების ზუსტ მიზეზს.

როგორც „ინტერპრესნიუსს“ შსს-ში განუცხადეს, მომხდარზე გამოძიება სსკ-ის 115-ე მუხლით დაიწყო.