მალე მდინარაძის ჯერიც დადგება - რომელიმე მათიკაშვილი, ან ოხანაშვილი პირველი გაუქანებს ქვას, თუ ამის სიგნალს იმ ბრძენი კაცისგან მიიღებს - უშველის კი გაქცევა?! ვნახოთ! - ამის შესახებ ოპოზიციონერი პოლიტიკოსი რომან გოცირიძე სოციალურ ქსელში წერს.

კერძოდ, ის ამით გამოეხმაურა მამუკა მდინარაძის გადადგომას და პოლიტიკიდან წასვლას და ამ კონტექსტში „ქართული ოცნების“ ყოფილ მაღალჩინოსნებზეც ისაუბრა.

„მდინარაძემ დაგვტოვა!

„ქოცი“ მონა დეპუტატები, განსაკუთრებით „პაიკა ციყვები“, გახარიას აღმერთებდნენ. პარლამენტში მის ყოველ გამონათქვამზე ტაშს უკრავდნენ, მლიქვნელურად უქნევდნენ თავს და თუ ოპოზიციას შეუტევდა, აგრესიულად უბამდნენ მხარს. მისი ენითაც კი დაიწყეს ლაპარაკი და ბევრი დღემდე, ისე რომ ვერც აცნობიერებს, კვლავ მის ლექსიკას იყენებს. განსაკუთრებით მოეწონათ მისი ფრაზა „მისმინეთ“ (რაც რუსული „სლუშაიტეს“ გავლენით გავრცელებული კალკია). საუბრის ბოლოს „წერტილის“ დაყოლებაც რუსული „ტოჩკას“ ბაძვაა. რუსულში ესენი ბუნებრივად ჟღერს, ქართულში კი არაბუნებრივად. „ქოცების“ მიერ ასეთი ენით საუბარი ქვეცნობიერად მისაბაძ გმირთან იდენტიფიკაციას ნიშნავდა. გადადგა გახარია და ყველამ მოღალატედ გამოაცხადა, ლანძღვა-გინების კორიანტელში გაახვია.

მერე ღარიბაშვილი გახდა მათი კუმირი. ეს უღირსი ადამიანები ღარიბაშვილის პროვოცირებით პარლამენტში თავს დაესხნენ გუბაზ სანიკიძეს და ფიზიკურად გაუსწორდნენ. 19 ლაჩარი ერთს დაუპირისპირდა. სინამდვილეში ეს თავდასხმა ღარიბაშვილის საამებლად და მისი გულის მოსაგებად კეთდებოდა.

ლილუაშვილს თვალებში ვინც შესციცინებდა, დღეს პირველ რიგში დგას ქვების სროლაში. სუსი, ვინც უნდა ყოფილიყო მისი უფროსი, განსაკუთრებული თაყვანისცემის ობიექტი იყო. ფიქრობდნენ, რომ მან ყველაფერი იცოდა მათი ცოდვების შესახებ.

ახლა მდინარაძის ჯერიც დადგა. „ქოც“ დეპუტატებისთვის ის განსაკუთრებით ახლობელია - 9 წელი ერთად იყვნენ პარლამენტში, ჩვეულებრივი დეპუტატთაგანი იყო, მაგრამ მას შემდეგ, რაც „გასუსდა”, განსხვავებული აურა შეიძინა, განსაკუთრებით, ღარიბაშვილისა და ლილუაშვილის დაპატიმრების გამო. მერე რა, რომ ეს ივანიშვილის ნება იყო - აღსრულებასაც დიდი გამბედაობა სჭირდებოდა, რადგან „ქოცებში“ საყოველთაო ზიზღს გამოიწვევდა.

მალე მდინარაძის ჯერიც დადგება - რომელიმე მათიკაშვილი, ან ოხანაშვილი პირველი გაუქანებს ქვას, თუ ამის სიგნალს იმ ბრძენი კაცისგან მიიღებს.

უშველის კი გაქცევა?! ვნახოთ. ღარიბაშვილიც ხომ განზე გაწევის, გაქცევის (ანუ, უნდობლობის) გამო ისჯება?“ - წერს გოცირიძე.

ცნობისთვის, მამუკა მდინარაძემ, რომელიც ბოლოს რეგიონული განვითარების მინისტრის პოსტს იკავებდა, მთავრობის ადმინისტრაციაში გამართულ საგანგებო ბრიფინგზე განაცხადა, რომ თანამდებობას ტოვებს და პოლიტიკიდან მიდის. მდინარაძის თქმით, 10 წელი, რაც ის პოლიტიკაშია, შრომის, სამშობლოს ერთგულების და მეგობრებთან ერთად დიდი საქვეყნო საქმის კეთების 10 წელი იყო. მისივე ინფორმაციით, პოლიტიკიდან წასვლაზე "ბოლო რამდენიმე კვირაა ფიქრობს". მდინარაძემ დღეს განაცხადა ისიც, რომ ძალებს სხვა სფეროში, მათ შორის ბიზნესში მოსინჯავს. პოლიტიკაში მის შესაძლო დაბრუნებასთან დაკავშირებით დასმული კითხვაზე პასუხად კი აღნიშნა, რომ რომ ეს უკიდურესი აუცილებლობის შემთხვევაში შეიძლება მოხდეს.

„ვფიქრობ, ცოტა დასვენებას და საკუთარ ოჯახზე ზრუნვას ვიმსახურებ. ჩემი შვილები, პრაქტიკულად, უჩემოდ გაიზარდნენ. თუ ძალიან დავჭირდები გუნდს და სხვა გამოსავალი არ იქნება, მარტო ამ შემთხვევაში დავბრუნდები“, - განაცხადა მდინარაძემ.