ისრაელისა და რუსეთთან დაკავშირებული ქსელები სეუტაში მიგრანტების კრიზისთან დაკავშირებით დეზინფორმაციას ავრცელებენ, - ამის შესახებ ესპანეთის პრემიერ-მინისტრმა პედრო სანჩესმა განაცხადა.

„30 და 31 ივლისის შემდეგ ჭორები და დეზინფორმაცია ვრცელდებოდა, რუსეთთან და ისრაელთან დაკავშირებული სოციალური ქსელების მიერ, ასევე, ულტრამემარჯვენე ინტერნაციონალის მიერ, რომელიც ყოველთვის იყენებს მიგრაციას არა მხოლოდ ესპანეთზე თავდასხმისთვის, არამედ ევროპის გასახლეჩად“, - განაცხადა სანჩესმა რადიო Cadena SER-თან ინტერვიუში.

მოგვიანებით, სანჩესის განცხადებას ისრაელის საგარეო საქმეთა მინისტრი გიდეონ საარი გამოეხმაურა.

„დღეს Cadena SER-თან ინტერვიუში მან კვლავ იცრუა და ისრაელი სეუტაში მომხდარ მოვლენებთან დაკავშირებით ცრუ ინფორმაციის გავრცელებაში დაადანაშაულა. ეს ურცხვი ტყუილია! ცილისმწამებლური ტყუილების გავრცელების გაგრძელებით სანჩესი ყურადღებას ვერ გადაიტანს ქვეყნის მართვაში სამარცხვინო კრახისგან“, - აღნიშნა საარმა.

შეგახსენებთ, 30 ივლისს, მაროკოდან სეუტას ანკლავში 70000-ზე მეტი მიგრანტი შეიჭრა. სეუტას ხელმძღვანელობის ცნობით, ანკლავის ტერიტორიაზე 10000-მდე მიგრანტი რჩება.