ესტონეთის ზოგიერთ ნაწილში ღამით საჰაერო განგაში გააქტიურდა მას შემდეგ, რაც დრონები ჩვენს საზღვარს მოუახლოვდნენ და ესტონეთის საჰაერო სივრცეში შემოვიდნენ, - ამის შესახებ ესტონეთის საგარეო საქმეთა მინისტრი მარგუს ცაჰკნა სოციალურ ქსელში წერს.

მისი ინფორმაციით, საპასუხოდ, ამარის საჰაერო ბაზიდან ნატო-ს მოიერიშე თვითმფრინავები აფრინდნენ.

„მოგვიანებით, ესტონეთის თავდაცვის ძალებმა საჰაერო განგაში გააუქმა. ნატო-მ სწრაფად და ზუსტად ისე მოახდინა რეაგირება, როგორც დაგეგმილი იყო. ალიანსი ფხიზლადაა და მზადაა დაიცვას მოკავშირეთა ტერიტორია“, - წერს ცაჰკნა.

მისი თქმით, ასეთი ინციდენტები უკრაინის წინააღმდეგ რუსეთის აგრესიული ომის პირდაპირი შედეგია და ხაზს უსვამს რუსეთზე ზეწოლის გაზრდის აუცილებლობას, რათა მან აგრესია შეწყვიტოს.